بی ایل ایف نا جارکش میجرگہرام بلوچ میڈیا ٹی شنگ مروکو درشان ئسیٹی پارے کہ سرمچار آک جھاؤ ٹی قوضہ گیر پاکستانی لشکر نا نوندڑہ ٹی اڈ مروکا مین کیمپ آ جلہو کرسا دشمن ئے سخت مالی و جانی نسخان تسُر۔
26 مئی نا شام ئنا شش بجہ آ بی ایل ایف قربان یونٹ نا سرمچار آک نوندڑہ جھاؤ ٹی اڈ مروکا پاکستانی لشکر نا کیمپ ئے چار انگا نیمہ آتا گھیرہ کرسا بھلا سلاہ تیٹ اسہ بھلو جلہو ئس کریر۔ دا جلہو ئٹی بی ایل ایف نا اسنائپر شوٹر آتا ٹیم ہم اوار ئس۔
دا سخت انگا جلہو ئٹی دشمن لشکر نا درزن نا کچ کارندہ آک خلنگار و کیہی کارندہ ٹپی مسونو۔ جلہو ئٹی دشمن لشکر نا پنچ آؤٹ پوسٹ و مین کیمپ ئنا کُل مورچہ آک ہم بھُس مسونو۔سرمچار آک مین کیمپ ئنا خُڑک آ سر مرسا اونا تہٹی دستی بمب خسار اراکان دشمن ئے بھاز جانی و مالی نسخان رسینگا۔
دا وخت آ خُلیس نا گواچی مروکا کیہی کارندہ آک تینا پکٹ و مین کیمپ آن نرار۔ جنگ چار گھنٹہ اسکان برجاء ئس۔ جلہو آن پد 27 مئی آ بے سہب آ لشکر ہردئی وڑ لس مخلوق آ جلہو کرے و کیہی ہند آتا لشکری کارندہ آک کسرتے بند کرسا بندغ آتے پریشان کننگ شروع کریر۔
دا جلہو ئٹی قربان یونٹ نا سرمچار سیکنڈ لیفٹننٹ اشرف عرف ریھان نوکاپ ولد مراد بخش کندڑی مشکے نا ہندی دشمن نا جوابی مارٹر گولہ نا زد ئٹ برسا شہید مس۔
شہید اشرف جان بلوچ جدوجہد آجوئی آن اسہ مخلص،سخت محنت کروکو و خطرہ تے مون تروکو سرمچار ئس اسک۔ او آواران نا جتا انگا محاذ آتا قوضہ گیر پاکستانی لشکر نا برخلاف کاروائی تیٹی بشخ ہلیسہ تینا بہادری و جنگی صلاحیت آتے نشان تس۔
چائنگ مرے کہ شہید اشرف جان بی ایل ایف ئٹی اسہ کاریم کروکو جہدکار ئسینا حیثیت ئٹ کاریم کننگ اسک و دشمن تون دو پہ دو جنگ ئٹی اِرا وار ٹپی ہم مسس ولے شہید اشرف جان اِرٹنگا وار جوڑ مننگ آن پد جنگی محاذ ئٹ مُست آن زیات پرجوشی ئٹ کاریم کننگ اس۔
جارکش پارے کہ بی ایل ایف شہید اشرف جان ئے خراج عقیدت ندر کیک و شہید آتا مشن ئے منزل اسکان سر کننگ نا قول کیک۔
چائنگ مرے وختس ارا محاذ آ سرمچار ئس شہید مریک گُڑا نن فخر ئٹ اونا شہادت ئے راج و جہان نا مونا ہتینا، اوفتا قربانی تہ اوفتے دروت ندر کینہ ولے دانا جاگہ پاکستانی لشکر نا جارکش آئی ایس پی آر تینا تنخواہ خور کارندہ تہ خلنگ مننگ نا کچ ئے کم کیک یا سر آن نمن مریک و بے تواری ئٹ کارندہ تہ جون تے ڈکھیسہ اوفتیکن فنڈ رائی کیک،انتئیکہ دشمن ئے تینا لشکر نا مورال تمنگ نا خُلیس الیپک۔دا جنگ ئٹی ہم آئی ایس پی آر تینا خلنگ مروکا کارندہ تے ڈکھنگ نا کوشست کننگءِ۔
