لسبیلہ بلوچستان ٹی پاٹ گُڈوکا لشکر جنگل آتے زْیات گُڈنگ ئٹی ءِ۔ سب تحصیل لیاری پھور ئنا ہندی خدا داد انگاریہ پھور وندر پریس کلب آ پریس کانفرنس ئٹی پارے کہ موضع پھور اسہ نمبر لیاری ٹی ہُرے آن ڈغارک کنا و میاں خان/ دین محمد، سائینداد/شیر محمد، محمد رمضان/بچل، غلام رسول/محمد الیاس، عبدالحلیم/عطا محمد، غلام حیدر/آدم، محمد یوسف/کریم بخش، عظیم/تھوہر نا مسّنُہ، ولے منَہ وخت آن جنگل آتا محکمہ و ضلعی چیئرمین نا بھلُنی ٹی دا ڈغارتان جنگل آتے گُڈینگک۔
اونا پاننگ کہ نن لیاری تھانہ نا ایس ایچ او ئے پارین ولے او ننے تھانہ آن پیشتمنگ نا پارے، جنگل آتا محکمہ ہم ننا خْواست ئے بنتو۔ پاٹ گُڈوکاتے پولیس و ضلعی چیئرمین کمک کننگ ءُ۔ ننا توننگ آن پد ولدا ہم درخت آتے گُڈیرہ و دے ئنا گاڈی تے پاٹ آن پُھر کرسہ بلوچستان نا ایلو جاگہ آتا و سندھ آ راہی کیرہ۔
او پارے کہ ڈی سی لسبیلہ نا کُنڈان جنگل آتا گُڈنگ ئے توننگ نا فرمان گچینو گام ئسے، ولے لیاری ٹی بھلا بندغاک و جنگل آتا محکمہ نا سوَب داڑا سلِنگ سخت لگّک۔ نن ڈی سی آن خْواست کینہ کہ سرکاری ادارہ و سرکاری بندغاتا برخلاف ہم کاریم کے۔ جنگل آتے گُڈوکاتا اوزار آتے ہَلے و اوفتا برخلاف قانودی وڑٹ گام ہفّے و ننے انصاف تننگے۔
