بلوچ راجی زْرمبشت (بی این ایم)نا بنجاہی جارکش’بْرمش دے’ ئنا رِدٹ درشان ئس شنگ کرسہ پارینے کہ بْرمش دے بلوچ جہد ئنا پوسکنا تاریخ نا پوسکنو باب ئسے۔ بْرمش دے ہمو بھادرا لمّہ تون تفوکے ہرا ریاستی کارندہ آتو سَرپُٹ کرے و تینا دتر ئے شولسہ پاکستانی ریاست نا زوراکی تا مونا جہد ئنا چراغ لگّفے۔
جارکش پارے کہ بْرمش دے نا مکست ہمو چُناتے، بھادرا لمّہ آتے و مزاحمت کروکا بلوچ چُناتے سلام کننگے ہرا راجی آجوئی کن مِڑ تسّہ و قربان مسّر۔ دا دے ننا یات آ شاغک کہ پاکستانی ظلم و تادی تا بیرہ ورناک گْواچی افس بلکہ چُنکا چُناک، نیاڑیک و بےگُناک ہم اریر۔ بلوچ تاریخ مدام ملک ناز ودی کرینے و مُستی ہم بلوچ دہنو بھادر ودی کرو انتئے کہ بلوچ چاگڑد ئٹی جہد مننگ ئٹی ءِ ہراڑے جہد مف اوڑے بھادر ودی مفک۔ بلوچ چاگڑد جہد، انکار و جرات آن پُھر ءِ۔
بنجاہی جارکش مُستی پارے کہ بْرمش دے ئنا مکست ملک ناز ئے سلام کننگ و پاکستان نا خرابا مون ئے دنیا ئے نشان تننگے، ہرا وڑٹ پاکستان بلوچ چاگڑد ئٹی خُلیس تالان کرسہ ورناتے بیگانہ کننگ خْواہک و دُز، دھاڑیل، نشہ بہاکروک و مذہبی زور تخوکاتے مُچ کرسہ لشکر جوڑانے، اینو بلوچستان ئٹی پاکستانی فوج ئنا بھلّائی ٹی چلّوکا موت ئنا کاروبار برجا ءِ ولے ہنداکان ملک ناز آک بش مریرہ جہد کیرہ و چاگڑد ئے پوسکنو حوصلہ بشخیرہ۔
جارکش ایسر ٹی پارے کہ ملک ناز نا کڑد بلوچ راجی تاریخ نا اسہ روشنو باب ئسے، دا دے ننے مزّل اِسکا یات کرفک کہ جہد ئٹی ننا بقا ءِ و جہد ئٹ بلوچ راج تینا بروکا دے تے روشن کننگ کیک و راج آتیٹ بریبری نا تیبری آ سلِنگ کیک۔
