جھل مگسی، خضدار و شال بلوچستان ٹی مُسہ جاگہ آ سُم کاری ٹی نیاڑی سے تون اوار چھار بندغ خلّنگا۔ خضدار ٹی سُم کاری آن مخلوق برانز کرسہ روڈ ئے بند کرے
گوٹھ سارنگانی جھل مگسی ٹی سِلابندا بندغاتا سُم کاری ٹی مُسہ بندغ خلّنگار۔
پولیس نا پاننگ کہ سِہکاری نا معاملہ سیٹ خلّنگانُہ۔
ایلو نیمہ آ نیو سریاب کلی گوہر آباد ٹی اِستو سُم کاری آن قاری عنایت اللہ سمالانی پِنی آ بندغ خلّنگا۔
خضدار ٹی ارباب کمپلیکس آ ہندو دکاندار ئس دُز ئتو سرپُٹ کرسہ سُم ئس لگّنگ آن ٹھپی مس۔
خضدار ٹی دے دےآن ارباب کمپلیکس آ ہندو دکاندار ئے پُھلار، سرپُٹ ئٹی ہندو دکاندار سنی کمار سُم ئس لگّنگ آن ٹھپی مس ، دُز نرّا ہنا، دکاندار ئے اسپتال آ راہی کننگا و ہُلّی چوک آن دکاندارک روڈ ئے تفیر۔
دکاندارتا انجمن نا کماش حمیداللہ مینگل تینا درشان ئٹی ارباب کمپلیکس آ ہندو دکاندار نا پُھلنگ آ افسوس کرے، او پارے کہ داسا اُلس و دکاندار تا دُزّ و دھاڑیل آتے یلہ کننگانے۔
خضدار دا وخت آ بھلو بےامنی سے آن گدرینگ ئٹی ءِ، شار ئٹی مخلوق نا جان و مال ئنا رکھ مفک، داسا دکاندارک برانز کرسہ روڈ ئے بند کرینُہ،ولے پولیس و انتظامیہ نا کارندہ آک ملّنگ کن بتنُہ نئے جاگہ آ سَرمسّنُہ۔
اونا پاننگ کہ داکان مہالو بازار ئٹی ہندو دکاندار آن لَکّھا زَرّآتے پُھلار و دا وار ارباب کمپلیکس آ دزّی ٹی سُم کاری آن سنی کمار ٹھپی مس و دزّاک لَکّھا زَرّآتے ہفّیر ہنار۔ دا وڑ نا بھازا تدینیک ہڑدے مریرہ ہرا دکاندارتیک پریشانی نا گپ ئسے۔
