زور ئٹ بیگواہ امیر بخش بلوچ نا مسڑ صدف امیر پارینے کہ کنا باوہ ئے چھار اگست اِرا ہزار چھانڑدہ ٹی کلانچ آن زور ئٹ بیگواہ کننگا ہرا داسکان خننگپک۔
او پارے کہ پاکستانی میڈیا بیگواہ مروکا بندغاتا خاہوت آتان تینا مون ئے ہڑسانے۔ دا وخت آ نہ بیرہ بلوچستان بلکہ پاکستان نا غُٹ آن بھلا مسئلہ زور ئٹ بیگواہی ءِ۔ ہزارا بندغاک بیگواہ ءُ کس نا جاگہ و حوال نا کس ئے سما اف، میڈیا، عدالت و پارلیمنٹ نا کارندہ آک تینے بےخبر کرینو۔
او پارے کہ اسہ نیاڑی ایم پی اے سے نا پرس گُم مرے تو قانود کاریم کیک ولے ہزارا بندغاتا گُم مننگ ئے مسخرہ ئس جوڑینگانے، ہرا اسہ ڈکھ ئنا ہیت ئسے۔ ای وار وار خْواست کیوہ کہ کنا باوہ امیر بخش ئے آجو کبو و ننے دا غم آن کشّبو ولے کس ئس ننا ہیت ئے بنپک۔
او مُستی پارے کہ زور ئٹ بیگواہی تا مسئلہ اسہ بندغی نا مسئلہ سے و بلوچ راج ئنا تو بقا نا مسئلہ ۔ ہر اُرا و ہر خاہوت دا دڑد آن گدرینگ ئٹی ءِ۔ ہندنو اسہ خاہوت ئس سائرہ و سعدیہ نا ءِ ہراڑان مسہ بندغ بیگواہ ءُ۔ رشید، آصف شش سال آن ہندن سلمان یک ءُ نیم سال آن بیگواہ ءِ۔ ولے عدالت و کمیشن بیرہ ساعت تیری کننگ ئٹی ءُ اسہ ادارہ ئس جْوان وڑٹ گام ئس ہفّنگ ئٹی اف۔ ہندا خاطر آن بلوچ وائس فار جسٹس نا کُنڈان بیست ءُ چھار مئی آ سوشل میڈیا آ ایکس (ٹویٹر) آ رشید، آصف و سلمان نا آجوئی کن مہم ئس چلّفنگو۔ ای غُٹ آن خْواست کیوہ کہ او دا مہم نا بشخ جوڑ مریر۔
