زہری نا ہندی بندغ نا اُراٹی زالبول آتا سُمکاری و 15 سالی آ مسڑ نا برمتہ کروکا تہ برخلاف کاروائی نا خواست۔
بلوچستان نا ضلع خضدار ناتحصیل زہری کہن نا ہندی ثناءاللہ زہری تینا خاوت تون اوار خضدار پریس کلب ٹی پریس کانفرنس کریسہ پارے کہ ای عزتدار غریب اُرا سے آن تعلق تخیوہ ہنوکا روچئی نا گڈیکو دے تیٹی شام تراویح نماز نا وخت ملزم قادربخش کہنی تینا مار نادر کہنی ، عامر کہنی و ایلو سلاہ بند بندغ آتون کنا اُراغہ سُمکاری کریسہ زالبول آتے ٹپی کریر ۔
ثناء اللہ نا رد ئٹ ہموخت ہندا بندغ آک اُراٹی ساڑی کُل بندغ آ تے ٹپی کننگ آن پد کنا 15 سال آ مسڑ نسرین ئے توفک نا زور آ تینتون اوار دریر ارا دائسکان ہموفتونے ۔
برمتہ مروکا مسڑ نا باوہ دوبہ خلکُنے کہ اوفتا اُراٹی جلہو کروکا و مسڑ ئے برمتہ کروکا زہری نا با اثر بندغ آتا کمک اوار ءِ ارافتیٹی ڈاکٹر شفیع زہری،رحمت اللہ کہنی،علی محمد کہنی،عطاءاللہ کہنی، علی شفیع کہنی اوارءُ۔
ثناءاللہ نا رد ئٹ اوفک برمتہ کروکاتے پناہ تیرہ ۔ تدینی نا برخلاف لیویز تھانہ زہری ئے ایف آئی آر کن خواست کرین ولے ملزم و اوفتا کمک کروکاک بااثر ءُ ارانا سوب آن کاروائی مننگ کتو۔
اوفک پاریع کہ زہری انتظامیہ نا مَنہ افسر زور و لالچ ٹی مریسہ بااثر بندغ آتے ہچ کپسہ ، میڈیا نا مون آ تینا فرادئے ہیسونُن ۔
او پاریر کہ ڈوہدار آتا کمک کروکاک سرکاری ملامز رحمت اللہ کہن،عطاءاللہ کہنی،علی محمد کہنی،علی شفیع کہنی ننے تڑی تننگ ءُ کہ بے توار مبو اگہ نا جوان مروف،اوفک کالخواہ تان خواست کریر کہ زوت نوٹس ہلیر و کنا مسڑئے آجو کریفر۔ ڈوہدار و اوفتا کمک کروکا تہ برخلاف کاروائی کننگ مرے ۔
