میری کلات کیچ آن بیگواہ مروک زمباد ڈیور صغیر سجاد کن اونا خاہوت اینو اسہ وار پدا ڈی بلوچ چوک آ دھرنا تس و سی پیک کسر ئے بند کرے۔ پدا پولیس سجاد حسین ئے ہلک و کسر ئے ملا۔
صغیر سجاد ئے ہندا ہفتہ ٹی اونا اُرا آن اونا ایلم قدیر سجاد تون اوار بیگواہ کریر ولے پدا قدیر یلہ کننگا ۔
صغیر سجاد کِن اونا خاہوت داکان مُست ہم ڈی بلوچ آ برانز کرسا کسر ئے بند کریسس ولے انتظامیہ نا اُست تننگ آ برانز ایسر کننگاسس۔
خاہوت نا پاننگ ئس کہ انتظامیہ نا نیمہ زان صغیر نا بیگواہ مننگ آن مجبور مرسا سی پیک کرس ئے بند کننگ ئٹی اُن اگہ صغیر ئے سلامت آجو کتوس گُڑا برانز ئے ایسر کروفن۔
ہنداٹی ڈی بلوچ آ دھرنا آن پولیس بیگواہ آ صغیر سجاد نا باوہ ئے دزگیر کرے، خاہوت نا پاننگءِ کہ صغیر سجاد نا آجوئی کن سُہب آن برجا آ برانز ئٹی پولیس ڈی ایس پی نا دروشم ئٹ بس مزاکرات نا کوشست کرے۔
خاہوت دوبہ خَلکنے کہ پولیس برانز ئٹی نیاڑی و چُنا تے پریشان کننگ آن پد برانز ئے ختم کننگ کن بیگواہ آ صغیر سجاد نا باوہ سجاد حسین ئے ہلک درے۔
یاتی مرے کہ سجاد حسین پولیس نا کارندہ سے، خاہوت نا پاننگءِ کہ پولیس نا خلّنگ، پریشان کننگ و سجاد ئے ہلّنگ آن پد مجبور مرسا کسرئے مَلان۔
