بلوچ یکجہتی کمیٹی نا جارکش پارینے کہ اسہ تُو ئسے آن مشکے، نلی چھاؤنی، تنک، ملیش بند و بنڈکی نا مخلوق کیمپ آتیٹ سزا کُننگءِ، اراڑے اُراتیٹ پیہسہ نیاڑی و چُھناتے سزا تننگءُ۔ نرینہ آتے دروغ ئنا دوبہ آتیٹ توننگک غریب مخلوق ارا مَش تیٹ رہینگک اوفتے خْوار کننگک۔ سُہب ئنا ہفت آن نن ئنا ہشت اِسکان اوفتان ویتہ ڈہاڑی آن کاریم ہلّنگک۔
درشان ئٹی پاننگانے کہ اِرا اپریل مشکے تنک آن مسہ بلوچ ورنا دزگیر کننگاسس ارا دائسکان بیگواہ ءُ۔ اوفتا خاہوت آک مسہ دے اِسکان برانز کریسُر ۔ ریاست بھازا چم بازی تیٹ برانز ئے بےسوب کننگ نا کوشش کرے، دروغ ئٹ اوفتے اُست تنّنگا کہ اوفتے مُسہ دے ئٹی یلہ کننگو ولے او داسکان آجو متوس بلکہ زور ئٹ بیگواہی داسکان مننگءِ۔
او پاریر کہ پنچ شمبے پانزدہ مئی آ مشکے گورجک ئٹی بھازا اُراتا چھاپہ خلّنگا اراڑے محبوب/یار جان، امجد/دین محمد، علی/دین محمد، تاج محمد/ ابراہیم، بلوچ/دلمراد، و عبداللہ/ عبدالقادر ئے زور ئٹ بیگواہ کننگا۔ اراکان پد اوفتا برانز مس و پنچ بندغ یلہ کننگا ولے عبداللہ/عبدالقادر داسکان بیگواہ ءِ۔ او اسہ استاد ئسے و چُھناتے قرآن خْوانیفک، علاقہ ٹی نماز ہم خْوانیفک۔
درشان ئٹی پاننگا کہ بلوچ یکجہتی کمیٹی بندغی حق آتا گَل و ایلو فکر ئنا بندغاتان خواست کیک کہ مشکے و مُچ بلوچستان ٹی برجاء انگا ظلم و تادی تہ برخلاف توار ہفّر، ہندن پیشن نا دنیا و بندغی حق آتا گَل آتے دا وڑ ئنا غیر انسانی کاریم تہ برخلاف تینا کڑد ئے نشان تروئی ءِ۔
