گْوادر و پسنی بلوچستان ٹی سرکاری ٹرالنگ نا سوَب آن ہندی آ مچھی ہَلوکاک شام ئنا اِرغ کِن پریشان۔
گْوادر آن بلوچستان اسمبلی نا باسک مولانا ہدایت الرحمن ادا غیرقانودی ٹرالنگ نا ایسری کن ہندی آ مچھی ہلوکاتان وؤٹ ہلکس ولے داسا ٹرالنگ مافیا نا مونا بیوس مسّنے۔
ہدایت الرحمن پائک کہ داسکان ہم گْوادر نیوی کیمپ آن خُڑک ٹرالر ارے ولے کس ئس اوفتے توننگ کپک۔
ایلو کُنڈان جبل ذرین پسنی ٹی گجہ ٹرالراک ءُ،مچھی نا محکمہ تون اوار مچھی ہَلوک (مید) آتا ہم گَل چُپءِ، نیست اِنگا مید آک اِرا وخت ئنا اِرغ کن رُلّیرہ۔
حوال آتا رِدئٹ پسنی ساحل غیرقانودی ٹرالراتا گْواچیءِ مچھی محکمہ نا مونا دا کُل مننگ ئٹی ءُ ولے او ہُننگ ئٹیءِ۔ زوراکا ٹرالنگ نا سوَب آن پسنی ٹی مچھی تا نسل نا چُھٹنگ آن کمپنیک بند ءُ۔ اسہ ہفتہ ٹی بھازا مچھی نا کمپنی تا کُلف لگّانے و بھازا مزورک بےروزگار مسّنو۔
یاتی مرے کہ مکران ٹی گیشتر مخلوق نا روزگار مچھی و باڈر نا کاروبارءِ، ٹرالر آتا سوَب آن روزگار نا وسیلہ آک چُھٹنگ ئٹی ءُ ہندن باڈر نا روزگار آن ہم لس مخلوق ئے توننگ ئٹی ءُ۔ دا وڑٹ بروکا وخت ئٹ ہند ٹی ڈُکّال برو و جیڑو ودی مرو۔
