گوادر ئٹی بلوچ یکجہتی کمیٹی نا پاننگ آ شار ئے واڑ کننگ نا برخلاف اسہ برانزی ریلی ئس کشّنگا، اراٹی نیاڑی، چُھنا، پیرنگا و ایلو بندغاک بھلو کچ ئسیٹ بشخ ہلکُر۔
ریلی ٹی اوار انگا بندغ آتا دُو تیٹ شار ئے واڑ کننگ، بلوچ نسل کُشی و زور ئٹ بیگواہی تا خلاف بینر، پلے کارڈ اسّر، ارا شہدائے جیونی چوک آ برانز کریر۔
برانز ئٹی بلوچ یکجہتی کمیٹی نا راہشون صبغت اللہ شاہ جی بلوچ و ایلوفک تران کرسہ پاریر کہ اسہ وخت ئس بندغاک پنجاپ آن گُونی تے زر آن پُھر کرسہ داڑے نا زمین تے ہلّنگ کن بسّسُر۔ ولے اوفتا زر آک ہِنار بلوچ اینو ہم تینا ڈغار آ تولوکءِ اوفتا دا تُغ وخت ئس ہم پورو مروف۔
او پاریر کہ دا پاننگک کہ گْوادر نا مخلوق نا رکھ ئکن واڑ کننگک، داسا سوج دادے کہ بلوچ ئے دیر آن خطرہءِ؟ او تینٹ بھلا دیوال آتا پد ئٹی ڈھکّانُو تینے۔
او پاریر کہ بلوچ ئے کس آن خطرہ اف، نم بَبو گْوادر ئے ہُربو داڑے مسیت و مندر اسہ جاگہ آ تفوک ءُ، دا گْوادر نا زیبائیءِ اگہ او واڑ کرسہ بلوچ نا زمین ئے پُھلنگ خْواہرہ تو اوفتا دا تُغ اسُل سرجم مفرو۔
تران کروکاک پاریر کہ گْوادر ئے واڑ کننگ داڑے نا مخلوق نا رکھ اف کہ اوفک زور ئٹ بیگواہی نا گْواچی ءُ۔ گْوادر ٹی سیلاب و لوڑو آن مچھی ہلوکاتا روزگار سلیسنے او بےاُرا مسّنو، مخلوق تینا ہنکین تے الّانے۔ اوتھاروک لوڑو ٹی ہِنوک ءُ ۔ گْوادر ئے چین و پاکستان کن کاروباری کسر ئس
جوڑنگ کن واڑ خلّنگک، ہندی آ مخلوق ئے خن ئٹی ہتنگپک و اوفتیک پین خواری ودی کننگک۔
شاہ جی پارے کہ حالت ننا مونا پھاشءِ، پیشن نا بندغ آتا رکھ ئنا پِن آ گْوادر مہالو آن اِرا بشخ کروکءِ۔ ایئرپورٹ آن ہلیس گْوادر پورٹ اسکان گْوادر پیشن نا بندغاتا آسراتی تیکن۔ داسا تو دا پاننگ ئٹی ءُ کہ رکھ ئنا پِن آ شار ئے واڑ کینہ بند کینہ، دا اَراڑے نا قانون ءِ کہ نم تینا رکھ ئکن ننا اُرا ئے جیل جوڑ کبو؟ ارب آتا زر ئنا بجٹ کُنوکا فوج ئنا داسا ننا اُراتے بند کرسہ رکھ مرو؟
