نیشنل ڈیموکریٹک پارٹی نا مرکزی جارکش بلوچ راہشون بابو شیرو مری ئے خراج تحسین ندر کرسا پارے کہ شیر محمد مری عرف شیرو مری ترقی پسند بلوچ راہشون ئس اسک ارا جہان نا چائنگوکا انقلابی تیٹی حساب مریک اونا مشقت والا زند ، بھلا مدت نا جُہد و پختہ نظریہ ورنا تیکن روشن ءُ کسر ئسے۔ شیرو مری کیہی سال اسکان جیل نا صعوبت آتے برداشت کرے ، بیرا بنیاتی تعلیم حاصل کننگ نا بنیات آ ہم پختہ نظریہ نا مالک، ادیب محقق اسک و اونا علمی بشارت آن کیہی ورناک باشعور مریسہ بلوچ راجی تحریک نا بشخ مریسہ حق ئنا جُہد ئٹی اوار مسُر ۔
جارکش پارے کہ او سیاسی جُہد ئنا بناء ءِ ریاست قلات نا آجو ارزشت نا بحالی و پدا زوراکی ئٹ اوار آن کیہی سال مُست بناء کرے ، ایوبی آمریت نا دور ئٹی بلوچ حق آتا رکھ اکن جہانی تحریک آتے ہُرا و انقلابی نقش قدم آ ہنیسا بلوچستان ئٹی گوریلا جُہد نا بنیات ئے تخہ ۔حیدرآباد سازش کیس ئٹی ہم ایلو بلوچ راہشون آ تون اوار بندمسس۔ اوغانستان جلاوطنی نا وخت آ بابو شیرو مری بلوچ نا شمار بلوچ راہشون بلخصوص نواب خیر بخش مری نا خُڑک ئنا سنگت آ تیٹی مسکہ ۔ اوغانستان ٹی سویت حکومت نا ہننگ آن پدا خانہ جنگی نا وخت واپس ڈیہہ آ بننگ آن پد ہم بے توار متو بلکہ بلوچ وسائل آتا رکھ اکن جُہدئے برجا تخا ، تینا زند ئنا گُڈیکو وخت اسکان نظریہ آ سلوک ئس کہ ” نن پنڈہ نا تینا حق خوائک ۔”
جارکش درشان نا ایسر ئٹ پارے کہ بابو شیرو مری نا زند مُرغنا جُہد ئنا داستان بروکا نسل تیکن روشن ءُ کسر ئسے اراڑا کاربند مریسہ بلوچستان نو آبادیات و سامراجی نظام ئے شکست تریسہ بلوچ راجی بقا، پجار نا رکھ و بلوچ چاگڑد نا وقار ئے بڑز کننگ کیرہ ۔
