امریکی صدر جوبائیڈن انتظامیہ جمعہ نا دے پارینے کہ اسرائیل نا نیمہ آن غزہ ٹی امریکہ نا تروکا سلاہ تہ کارمرز ئٹی جہانی قانون آتا خلاف ورزی مسُنے۔
غزہ جنگ ئٹی جہانی قانونی آتا خلاف ورزی نا ثبوت آتا رد ئٹ جمعہ نا دے کانگریس ئٹی ہتوکا تیدری ٹی مسنے ارا بائیڈن انتظامیہ نا نیمہ آن سخت انگا تیدریءِ۔
امریکہ غزہ جنگ ئٹی اسرائیلی لشکر نا جلہو تیٹی خاص امریکی سلاہ تہ کارمرزئے چائنگ کتنے ولے انتظامیہ بروکا کن وخت اکن اسرائیل مخصوص انگا سلاہ تے تفننگ نا رد ئٹ کسر ارزان مسنے۔
دا تیدری ہفت تُو ئنا فضائی جلہو، زمینی جنگ و فلسطینی سیم ئٹی کُمک تے توننگ آن پد مونی بسنے۔
دا جنگ ئٹی دائسکان 35 ہزار نا کچ ئٹ فلسطینی خلنگ مسنو ارافتیٹی گیشتر چُنا و زالبولءُ۔
اسرائیل۔ حماس جنگ 07 اکتوبر آ حماس نا اسرائیل آ جلہو آن پد بناء مس اراٹی 1200 اسرائیلی خلنگار و 250 بندی کننگاسُر۔
تیدری ٹی پاننگانے کہ اسرائیلی لشکر نا راہا تجربہ،ٹیکنالوجی و حوال آک اریر کہ اوفک امر لس شاری تہ نسخان ئے کم کننگ کیرہ ولے لس شاری تہ بھلو کچ ئسیٹی کوش کیہی سوج آتے ودی کیک ارافتا سیالی سلاہ تہ کارمرز تون تفوکءِ۔
اسرائیل نا رد ئٹ او امریکی و جہانی قانون آتا عمل کننگءِ و تینا لشکر نا نیمہ آن مروکا خلاف وزری تہ رد ئٹ پٹ و پول کننگءِ۔
