یک شمبے نا دے چاغی بلوچستان ئٹی پاکستانی فوج ئنا دُو آن بلوچ ورنا ئس خلّنگا۔
بلوچ یکجہتی کمیٹی چاغی درشان ئس شنگ کرسہ پارے کہ بلوچ ئے لس وڑٹ خلّنگ ئٹی ءُ۔
درشان ئٹی پاننگا کہ ایران و پاکستان نا سیم آ راجئے روتک ئٹی پاکستانی فوج ئنا سُم کاری ٹی ہودہ سال ئنا بلوچ ورنا ئس ساہ تِس۔
او پارے کہ درو نا دے یک شمبے آ میرجاوہ شار ئنا سرحدی ہند روتک ئٹی اسہ بلوچ ورنا ئس پاکستانی سرحدی لشکر نا سُم کاری ٹی ٹھپی مس و پدا ساہ تِس۔
درشان ئٹی پاننگا کہ بلوچ ورنا طہٰ زابدزئی (شاہنوازئی) باوہ نا پِن رحیم آ درست مسّنے ارا خاش شار ئنا رہینگوکوسے۔
او پارے کہ یک شمبے نا دے ویگہ نا دوانزدہ بجہ غا سرحدی فوجی لشکر طہٰ نا سرغ ئٹی سُم ئس خلکُنے اراڑان او ٹھپی مرسہ جہان آن موکل کرے۔
بلوچ ورنا نا خلنگ آ ڈاکٹر ماہ رنگ بلوچ ایکس (ٹویٹر) آ پارے کہ چاغی ٹی فوج ئنا سُم کاری ٹی ہودہ سالی ورنا طہٰ زابدزئی شہید مسّنے، بلوچستان ٹی مخلوق ئے روزگار نا ہم حق ملّنگ اف و دانا خلاف ہیت کروکاک ریاست نا زوراکی تہ گْواچی ءُ۔
