نیشنل ڈیموکریٹک پارٹی نا مرکزی جارکش تینا درشان ئٹی پارینے کہ اَسہ وار پدا ریاستی نمائندہ آک بلوچ وطن نا ہند گْوادر ئے اِرا جاگہ آ بشخنگ نا پالیسی آ عمل کننگ ءُ ۔ مَنہ سال مُست ہندا پالسی نا رد ئٹ گْوادر ئے واڑ کننگ نا زریعہ ئٹ اِرا جاگہ آ بشخیسہ بلوچ ساحل ئے یکہ کننگ نا کوشست کننگا ، ارادے بلوچ راج و ماہی گیر آک برانز آن پدا کھمبہ تے کشار ۔ داکان مُست ہم نو آبادیاتی پالیسی تہ رد ئٹ جنوبی بلوچستان نا پِن آ صوبہ جوڑ کننگ نا تجویز تریسہ بلوچستان ئے بشخنگ نا کوشست کننگا، ارادے ہر نیمہ آ مذمت مون تروئی تما ۔
جارکش مُستی پارے کہ دُننگا کُل پالیسیک بلوچستان نا مڈی تے لُٹ و پُل نا کسرتے صاف کننگ نا حکمت عملی ءُ۔ امر برطانیہ ہندوستان نا مڈی تے لٹیسہ ترقی کروکا چاگڑد تیٹی اوار مس ،ہندُن ریکوڈک ڈھکوک معاہدہ کریسہ بلوچ مڈی تے بہا کننگ ءُ ، بلوچ سرزمین نا معدنیات ،خیسُن ،تانبہ، کوئلہ،گیس و ایلو مڈی تے لُٹیسہ بلوچ و بلوچستان ئے پدمنتا پاریسہ وفاق خاص کر پنجاب ئے انفرسٹرکچر ئے دیمرئی نا پِن ئٹ مضبوط کننگا ۔امر بلوچ آک انگریز سامراج نا برخلاف مزاحمت کریسہ کالونی جوڑ مننگ آن نمن کریر دا وار ہم ہمو عمل ئے دوارہ کرسا یکہ ایسر نا اُمیت تخنگ تنیا خیالی مرو۔
جارکش درشان نا ایسر ئٹ پارے کہ گْوادر نا واڑ کننگءِ زو توریر ، دا پاننگ خواہنہ کہ نیشنل ڈیموکریٹک پارٹی بلوچ مڈی تہ لُٹ و پُل،بلوچ سرزمین نا بشخنگ ءِ ہچ برداشت بلکہ ہرچ فورم آ بلوچ راجی بقا و پجار نا رکھنگ کن سیاسی جُہد کریسہ حق ئنا توارئے بُڑز کرو ۔
