تربت بلوچستان ٹی تربت یونیورسٹی ٹی تعلیم نا شعبہ نا نیمہ آن آرٹس کرافٹ، کیلی گرافی و ماحول نا زیہا چائنداری آ دیوان ئس اڈ تننگا۔
تربت یونیورسٹی نا پرو وائس چانسلر ڈاکٹر منصور احمد دیوان نا بِنائے کرے۔
دا وخت آ رجسٹرار گنگزار بلوچ، تعلیم نا شعبہ نا چیئرپرسن منظور احمد، فیکلٹی باسک آک مہناز اسلم، مہناز بشیر، رقیہ میروانی و یونیورسٹی نا ایلو افسراک ساڑی اسّر۔
شعبہ تعلیم نا خوانندہ مسِڑ و مارک عکس کشی، زیبائی ئٹ لکھنگ نا گچینو تخلیق مونا ہیسر ہندن سِیلہ و دسک ئٹ جوڑ کروکو فن پارہ و پیپر کوئلنگ تون دود ئنا زیہا نمونہ ہم تخننگا ۔ ارا تعلیم، عکس کشی، ماحول نا سائنس و کشت و کشار نا خلقی و پوسکنا وڑ ئنا ندارہ ئے کرفّیرہ۔
دیوان آ ہیت کرسہ جامعہ تربت نا پرو وائس چانسلر ڈاکٹر منصور احمد خوانندہ آتا تخلیق آتے گچین پارے۔ او اوڑے تِخوکا کاریم تا سرہال، جوڑنگ و پھاشی ئے ہم جْوان پارے۔
او مُستی پارے کہ خوانندہ آک بروکا وخت ہم تعلیم نا ادارہ آتیٹ استاد مرسہ تینا ہنر آتا درشانی ئے کرسہ کرور۔ دا وڑ ئنا دیوان ئس سرسوبی ئٹ اڈ تننگ کن تعلیم نا شعبہ نا کماش و فیکلٹی نا باسک آتا ستا کرے۔
او پارے کہ دا دیوان دا ہیت ئے پھاش کیک کہ تربت یونیورسٹی خوانندہ آتا تخلیقی ہُنر ئے، پوسکنا کاریم تے و ضابطہ نا چائنداری تے شون تننگ کن سَلوکءِ۔
یونیورسٹی نا خوانندہ مسڑ و مارتا بھلو کچ ئس، استاداک، انتظامیہ نا باسک آک و ایلو خْواننگ نا ادارہ آتا بروکا خوانندہ آک و استاداک دیوان تو بھلو اُست خْواہی ئس نشان تسُر۔ ہندن عکس کشی و فن ئے مونا ہتوکاتا ہنر ئے گچین پاریر۔
