بلوچ یکجہتی کمیٹی نا راہشون ڈاکٹر ماہ رنگ بلوچ ایکس (ٹوئٹر) آ تینا خیال ئسے درشان کرسہ پارے کہ گوادر شار ئے واڑ کننگ مخلوق ئے بےاُرا کننگ نا چم ئسے۔ اِرا ہزار بیست ئٹی اولیکو وار کوشست کننگا ولے بلوچ مخلوق دا کاریم ئے تورے۔
او پارے کہ زور ئنا کاریمک نہ بیرہ مخلوق ئے یکہ کیرہ بلکہ آباتی تے بدل ہم کننگ کیرہ، اراڑے بلوچ تینا ڈغاز آ بِدر مننگ کیک۔ داخسا بھلا منصوبہ آک دائسکان بلوچ راج ئے آسراتی تننگ ئٹی افس، گوادر شارئے واڑ کننگ نا مراد دا مریک کہ سی پیک خُلیس و ہِنڑز ئے ودّفسہ جہی آ مخلوق ئے پد تِخنگءِ۔
او پارے کہ دا ونڈ کننگ ئے زیات کرینے و مخلوق آ پین زوراکی ہیسنے، ہندی آ مخلوق داسا بیرہ سرکار ئے تینا دامون ایمون خننگءِ، زور ئٹ اوفتے ہمپفنگ ریاست نا کُنڈان بندغی حق آتا خلاف ورزی تان اسٹءِ۔ تیوعہ بلوچ مخلوق ئے اونا باوہ پیرہ ئی آ ڈغار آن کشّنگ ئٹی ءُ تاکہ او درپدری نا زند گدریر، ظلم و تادی خنِر۔ اوکان پد ہم جہدکارا بلوچ مخلوق تینا ڈغار ئے الّینگ کن تیار اف۔ داسا گوادر شارئے واڑ کننگ نا اسہ پین چم ئس مننگءِ اراڑے ہندی آ مخلوق نا خْواریک خن ئٹی ہتنگپسہ۔
ڈاکٹر ماہ رنگ بلوچ نا پاننگءِ کہ چائندارا بلوچ راج تینا وطن ئے کھپ کننگ نا ریاستی کوشست ئے سرسوب مننگ کن الیپرو انتئے کہ دا وڑ ئنا کاریمک مخلوق ئے پین پدی بٹرہ و ظلم ئے سوگو کیرہ۔ مُستی پارے کہ چمن ئٹی امن ئٹ برانز کروکاتا فوج ئنا سُم کاری پریشانی نا گپ ئسے۔ دا برانز و امن ئٹ مُچی نا اُلس نا بنیاتی حق آتا خلاف ورزیءِ۔ کنا خْوشّامدی و اُست خْواہی ریاستی ادارہ آتا ظلم ئنا گْواچی مروکاتونے۔ چمن برانز ئنا برانزی تہ خْواست آتے بِننگ مرے۔
