نوشت : مرید بلوچ
مَٹ : نزہت بلوچ
”ودار“
ہردے نا وڑ یخ آ شام ئٹی ہفتاد سال آ زالبول ماہ بی بی اُرا ٹی تنیا کس ئنا ودار ئٹی تولوک اسک۔ او دا پریشانی ٹی اسکہ کہ ہردے نا وڑ انت اینو ہم او ودار کریسہ تُنگان ہنو یا اینو شام اودے اوخس ودار کروئی تمپرو ۔ او سوچ آتا سمندر ٹی داخس در گوہنگاسس کہ وختس ہنوکا وخت ئنا نا کہکشان تیٹی ہناکہ وختس بروکا وخت ئنا زیباغا تُغ تیٹی بال کریکہ ، لاشعوری حوال ئٹ اودے مارشت مس کہ اراوخت او بروکا وخت ئنا گمان کیک اونا خنک روشن مریرہ و اونا مون آ بشخندہ بریک، ہمو بشخندہ ارا اونا ورنائی ٹی اونا ہمسفر اسکہ۔ او ہندا سوچ آ تیٹ تینتوں گھٹ ئس کہ دروازہ پچ مننگ نا توار اودے حیران کرے ۔ ”ہئو دا ہموفک او“ اونا اُست اوڑتون ہیت کرے ۔ ہندا سوب آن ٹھکیفنگ آن بیدس دروازہ پچ مننگ نا توار بسونے۔“ شعور ہم اُست تون مَنہ ۔او بش مس زو رُمب کریسہ امر دروازہ ئے سر مس ، اونا خوئشی نا کچ الیتوکا، اونا اینو نا دا ودار مفت ئٹی ہنتو ،تینتون ہیت کریسہ اونا خڑینک آک بسُرہ ۔
”راہشون“
نثار تینا تومکا سنگت آ تون شام آن ودار ئٹی اسک کہ مَچہ تارمئی مرے،او و اونا دمدرینگوکا سنگت آک ارا ہنوکا ہفتہ آن اوتاخ ئٹ تینا ذمہ واری تے پورو کننگ اسُر و داسا شہر آ مون کریسُر تاکہ اینو نا شام رکھوک جاگہ سے آ رہینگ کننگ کیر ۔نثار تون اوار اونا سنگت زوہیب و استاد دودا اسُر ۔ زوہیب ارا اونا چُنکی نا سنگت مننگ تون اوار اونا نظریاتی سنگت ہم اسکہ۔ و مُدامی نا وڑ اینو ہم اوڑتون اوار ئس۔ زوہیب آن بیدس اودے دودا تون اوار وخت گدرینگ بھاز دوست بسکہ او سینئر مننگ آن بیدس اَسہ جوانو سنگت و مہروان یُ بندغ ئس اسم ۔ نثار ئے دا سنگت ئٹی مُدام تینا باوہ نظر بسکہ، ہموہن نثار کن فکر کریکہ اونا خیال ئے تخاکہ، اودے پَنت تدکہ و اَسہ استاد ئسینا وڑ اونا ہر عمل ئے خوڑتی ئٹ ہُراکہ ۔ شہر آن مُستی داسا نثار نا ذمہ واری اسکہ کہ احتیاط نا طریقہ آتا خیال کرسا ٹھکانہ نا نیمہ آ ہننگ نا فیصلہ کے ۔ او ہنوکا پنچ گھنٹہ آن شہر ئنا ویران مننگ نا ودار کریرہ و شام ئنا اِرٹمیکو پاس ئٹی او تینا موٹر سئیکل آتے شہر آن خُڑک ٹھکانہ کرسا تینا شہری ٹھکانہ نا نیمہ آ پَندا ہننگ نا فیصلہ کریر ۔
”آرام“
ماہ بی بی اینو بھاز خوش خننگاکہ اینو اونا اسٹ انگا نواسہ نثار اونا مون آ ئس ، او اُست ئٹی خواہاکہ کہ نثار نا سرئے تینا کُٹ ئٹی کرسا خاچیفے ، ولے نثار تون اونا لُمئی آ مہر ایلو چُناتے بے مہر کپ ارافتے کن او نثار نا وڑ مہر کریکہ ، او زوہیب و دودا آن جوانیکان واقف ئس و اوفتا مون آ دُہنو رویہ ئس کننگ خواہتوکہ اراڑان اوفتے دا تاثر مرے کہ او نثار آن جتا ءُ ۔ ماہ بی بی اِرغ تے گرم کننگ نا نیت ئٹ بش مس،زوہیب اودے نمن کرے و ” کوش“ اراخاص ہموڑکن ہیسس، جیب آن کشا اونا حوالہ ئٹ کرے ۔ماہ بی بی زوہیب نا پیشانی آن چوک ئس ہلک و اوفتے چاہ کُنیفے و اوفتا کمرہ اسکان اوفتے رخصت کرے، دودائے ہدایت کرے کہ کنے سماءِ نُم خاچبو۔
”ذمہ واری“
دودائے مارشت مس کہ مُدام اوفتا بننگ آن مُست اوفتے کن لہپ شاغوک مریک او سوچ خلکاکہ دا پیرنگا زالبول ئے اوفتا بننگ نا الہام مریک یا دا اونا ہردے نا کاریم ئے کہ لہپ آتے ہندُن ہردے صفا کے شاغے ۔ دودا اراوخت دانگا گام تخاکہ اودے تینا لُمہ نا بھاز یات بسکہ، ولے او وختس ہم دا ہیت ئے پاتوکا۔ خاچنگ آن مُست دودا اَسہ وار پدا ڈن ئنا کُل گڑاتے ہُرا، ارافتے اودے نثار ئے ہدایت کریسس۔ پدا کمرہ نا نیمہ آ بننگ آ نثار و زوہیب اونا خن تیٹ سوج ئسے نا ورندی پٹنگ اسُر، اراڑکن او خن و جوڑ تے کارمرز کریسہ ہئو کرے۔ داسا اوفتون اوار خاچنگ کہ بیرا اِرا گھنٹہ ءُ نیم اسک و سُہب مننگ آن مُست اوفتے شہر ئنا ایلو ٹھکانہ نا نیمہ آ ہنوئی اسکہ ۔ او مُسٹ انگا تینا پسٹل و ایلو سامان تے خُڑک کریر و تینا لہپ آتا خاچار۔
”دشمن نا جلہو“
یک ءُ نیم گھنٹہ آن ماہ بی بی اُرا نا مون ئٹی چکر خلنگ اسکہ ، او وار وار و مدا مدا خرینگاکہ و اونا جوڑک لڑزنگ اسُر بلکہ گڑاس خواننگ اسک۔ یک ءُ نیم گھنٹہ ئنا چرینگ پیرنگا زالبول ئے دمدریفے،او باورچی خانہ نا نیمہ آ ہنا تاکہ چاہ باسفے کُنے و او تینا دمدرینگ ئے مُر کے ۔ دہ منٹ اسکان او باورچی خانہ و حال ئٹی ئس و داسا ایلو حال آن مریسہ اُرا نا مون ئنا نیمہ آ ہننگ ئس ۔ اونا اُست خُلیس و اونا اُست زور زور آن توار کننگ اسکہ، اونا چُنکا گام آک تیز مسُر ، داسا ہم او ہمو کمرہ نا نیمہ آ ہنتو ، اراڑے اونا نواسہ و اونا سنگت آک خاچوک اسُر۔ او مچے پریشانی ٹی ئس و اُرانا چار انگا کُنڈ آتا چکر خلنگ ئٹ گڑاس خف توننگ نا کوشست کرے۔ اچانک او ہبکہ مس ، بوٹ آتا ٹھپ ٹھپ و پنوک اُردو ٹی خلوت اودے یخین تس کہ خطرہ اَسہ وار پدا اونا در ئے سر مسونے، او پریشانی ٹی ہمو کمرہ نا نیمہ آ رُمب کرے اراڑے اونا نواسہ و سنگت آک تہ خاچوک اسُر۔
”مونی گام“
نیم گھنٹہ نا تُغ دودا نا دمدرینگ ئے مُر کریسس،او ایلو دے ئنا مشن نا سوچ ئے خلنگ ئس اوتینا خیال آ تیٹی تیوعہ معاملہ ئے وار وار ہتنگ ئس و لاشعوری ئٹ اونا ناخنک سُرارہ ۔ او مدا مدا بش مس توس، قلم کاغذ دو ٹی ہلیسہ لکیر کشہ و سوچ خلیسہ اوفتے صفا کریکہ پدا نوشت کریکہ ۔ او تُغ ئٹی لیٹوک تینا سنگت آتے وار وار ہُراکہ ۔ پدا اچانک اونا دُو سلیس اونا خنک کھڑکی نا نیمہ آ سلیسُر و گڑاس خف توننگ نا کوشست کرے ،او بش مننگ ئس کہ اودے باورچی خانہ نا رزان تہ توار بس او بش مننگ تون کھڑکی ئے ملا ہموڑے سلیس۔ کسر آ توار و تیز روشانئی اودے ہبکہ کرے ۔ او تینا ہرتوما سنگت آتے بش کرے و اوفتے پوہ کرے۔ مُسٹ انگا داسا تینا پسٹل و سامان تے ہرفسہ تیار تولوک اسُر ۔
”ملامتی“
ماہ بی بی رُمب کریسہ دروازہ نا نیمہ آ بَننگ اسک دروازہ پچ مس و دودا پیشن نا نیمہ آ بننگ ئس۔ ماہ بی بی تینا گام تے توننگ آن ابید ہُننگ نا بناء کرے۔ اودے مارشت مس کہ دودا نا خَنک میدان جنگ ئٹی دھڑنگوک سپاہی نا وڑ خیسُن اسُر،اونا ہرتوما سنگت آک سرمچار آتا دروشم ٹی بس اسُر۔ دودا ماہ بی بی نا نیمہ آ ہُرا و خنتیٹ تسلی ترسا اجازت تس و اُرا نا راستیکو نیمہ آ مچ آتا نیمہ آ اِیلو سنگت آ تون اوار پیشتما۔ ماہ بی بی نا خَن تیٹی خڑینک ئس او وار وار گڑاس خواننگ ئس،اودے تینا عمر، نزوری چاہ کُننگ آ ملامتی نا مارشت مننگ ئس۔
”منصوبہ بندی“
دودا تینا دُو تیٹ اشارہ تس امر کہ زوہیب و نثار مُست آن خوانوکا سبخ آ عمل کننگ نا بناء کریر۔ نثار پد ئنا دیوال نا نیمہ آ ہُرا و زوہیب صحن نا چپیکو نیمہ آ ومُستی نیمہ آ ہُننگ نا بناء کرے ۔ نثار و دودا تینا کاٹم تے سُرفیسہ نہ ٹی اشارہ کریر ۔ داسا ہرتوماک زوہیب نا نیمہ آ ہُننگ اسُر ۔ زوہیب ہم مُر آن تینا اشارہ ئے کمانڈر اسکان سر کرے و دودا نا دُو بُڑزا مس و مُسٹ نا اشارہ کرے ۔ داسا او پوہ مس اسُر کہ اوفتا اولیکو اِرٹمیکو رکھیفوک تدابیر اوفتا حق ئٹی افس او مُسٹمیکو منصوبہ آ عمل کننگ نا بناء کریر ۔
”بروخت جلہو“
مُسٹ انگا سرمچار آک تینا مورچہ تیا تیار تولوک اسُر۔ نثار ئے تینا خُڑک ئٹ خلوت و سیڑھی تہ توار بس و دودا نا نیمہ آ ہُرا ۔ دودا اشارہ کرے ۔ایلو پاس آ نثار دستی بمب کشیسہ خسنگ اسکہ و ایلو نیمہ آ چیہانٹ و رُمب کننگ نا توار بننگ ئس۔ داڑے زوہیب زمین آن چندی فُٹ بُڑز تینا مورچہ ئے مالو ہُراسس۔او تینا کلاشنکوف آن سُم خلنگس۔ ایلو نیمہ آ مشین گن تہ با پچ مس ہندن گمان مس کہ تیوعہ ہند میدان جنگ جوڑءِ ۔ ہندیک ہم پوہ مس اسُر کہ لشکر اوفتا ہند ئٹی سر مسُنے۔ ایب کھیب ئٹ سرمچار آ تون جنگ بناء ءِ۔ دہ منٹ گدرینگ ئس کہ ایب کھیب نا اُراتا لئیٹ آک بند مسُر۔ پانزدہ منٹ آن اسہ وڑ سُمکاری برجاء ئس و لشکر نا لاری تہ کچ ہم ودینگ اسک ۔
”منصوبہ“
زوہیب تینا پوزیشن آن کُل سُر پر آتے ہُننگ ئس، او ایب کھیب آ ہُرا و دودا ئے توار تریسہ اشارہ کرے و پاس پاس آ سُمکاری کریسہ کریکہ۔ نثار نا برابر جاگہ آ گرنیڈ خسنگ آن خُڑک ئٹ ساڑی دشمن کارندہ آک خلنگ و ٹپی مس اسُر، داسا زوہیب ہندا کوشست ئٹی ئس کہ دشمن ئے امر مرے بھاز وخت اسکان اُرا آن مُر تخے ۔کُل آن مُست نثار و پدا دودا دیوال آن خُڑک کاریز اِسکان سر مسُر۔ اول نثار کاریز ئٹی دھڑنگا اراکان پدا مچے سُمکاری و ہینڈ گرنیڈ نا سرسُہبی ئٹ کارمرز کننگ آن پد زوہیب ہم دودا تون اوار کاریز ئٹی دھڑنگا۔ سُمکاری دائسکان برجا ئس۔ دشمن خُلیس آن اُرا آن مُر سُمکاری کننگ ئٹ آختہ ئس۔ کاریز آن شیف مچے مُر آن پدا نثار پیشن ہُننگ نا کوشست کرے اراکان اندازہ مننگ کریکہ کہ اوفک اخس کسر ہناسُر و پین اخس اوفتے داکسر ئٹ ہنوئی اسک ۔
”قدرت“
کاریز آن پیشن کاٹم کشنگ تون نثار ئے اندازہ مس کہ دشمن بھلو کچ ئسیٹی تیوعہ ہند ئے گھیرہ کرینے، ایلو نیمہ آ سُمکاری ہم پاس پاس اتون برجاء اسک۔ بلکہ اوفتا کاریز ئٹی دھڑنگ نا اندازہ دشمن ئے مسس۔ ولے گڑاس نثار ئے پریشان کرے و زو دھڑینگیسہ دودا تون خلوت کرے۔ اوفتے مارشت مس کہ خُڑک کاریز ئٹ دشمن تینا مون دستی بمب خسنگ ئٹیءِ ۔او داسا دشمن آن بھاز مُر بس اسُر۔ او نیم گھنٹہ نا کچ اسہ وڑ کاریز ئٹ ہِننگ آن پدا پیشتمنگ نا فیصلہ کریر۔ داسا دشمن آن بھاز مُر بس اسُر و ارزانی ئٹ رکھوک ٹھکانہ نا نیمہ آ ہننگ کریرہ، ولے او مُسٹ اِنگا دائسکان پریشانی ٹی اسُر ۔
”جوزہ“
ماہ بی بی ئے داسا خبر تماسس کہ اونا مُسٹ انگا بہادر آ چُناک دشمن ئے ریفیسہ پیشتمانو، او صحن و کاریز نا نیمہ نا ہند ئے ہُرا و ارا وخت دا پوہ مس کہ دشمن نا جلہو اُرا نا نیمہ آ نہ بلکہ کاریز نا نیمہ ءِ ۔ او دانگ اینگ ہُرا و اونا خنک مورچہ آ تمار اراڑے زوہیب کلاشن کوف ئے خلکس او بیدس سوچنگ آن مورچہ نا نیمہ آ گام ہرفے، مورچہ ٹی توس و سُمکاری ئے بناء کرے۔ اونا داعمل دشمن نا دیہان ئے کاریز آن پدا اُرا نا نیمہ آ کرے و سُمکاری نا پدا تیز مس۔
“بشخندہ”
گھنٹہ سے نا وخت گدرینگاسس ، دشمن دائسکان وار وار ئنا سُمکاری ئے برجا تخاسس۔ سُمکاری تیز مس، داسا او وڑ الوکا و دستی بمب آک ہم کارمرز مننگ الوسر ۔ دشمن نا بکتر بند لاریک تیزی ئٹ جلہو کننگ نا فیصلہ کریر۔ پنچ منٹ آن پدا اُرا نا مین گیٹ پِناسس و دشمن بکتر بند لاری تون اوار صحن ئٹی ساڑی ئس۔ داسا سُمکاری نا توار بندمسس۔ دشمن دائسکان خُلیس ئٹی ئس و اوفتے دا ہیت ئنا یخین ئس کہ خُڑک ئٹی کس اوفتا ودار ئٹی تولوکءِ ۔ اوفک اُرا ئے چار کُنڈ آن گھیرہ کننگ آن پد سُمکاری کروکا ئے پٹنگ کن تیوعہ اُرا ئے پٹارہ، کسس اوفتا دُو تیٹ بتو بیدس وے سلاہ بند انگا ہفتاد سال آ زالبول ہرا دون آن خُڑک سلوک دشمن ئے ہُریسہ طنز ئٹ بشخندہ کننگ ئس اودے اَسہ وار ئس پدا مارشت مس کہ دا ہمو بشخندہ ءِ ارا اونا ورنائی ٹی اونا ہمسفر اسک۔
