اقوام متحدہ نا بندغی حق آتا کونسل (یو این ایچ آر سی) افغانستان ئٹی بندغی حق آتا خلاف ورزی تہ رپورٹ ئس شنگ کرے۔
رپورٹ نا رد ئٹ طالبان سرکار نا نیمہ آن افغان اُلس تون بھازا وڑ ئنا زوراکی کننگک، اوفتا سرکار ئٹی بھازا بندغی حق آتا خلاف ورزی ٹی ودّیکی بنّنگءِ۔
رپورٹ ئٹی پاننگانے کہ افغانستان نا راجی لشکر نا ہشت سد کارندہ خلّنگانے، ہندن طالبان سرکار ئٹی سئے سد ءُ سی ءُ چھار ہزارہ خلّنگانے و شش سد ءُ سی ءُ یک ٹھپی مسّنے۔
رپورٹ ئٹی پاننگانے کہ جنوری اِرا ہزار بیست ءُ دو آن جولائی اِرا ہزار بیست ءُ سئے اِسکان افغانستانئ ٹی بندغی حق آتا خلاف ورزی ٹی شانزدہ سد آن زیات تدینی مونا بسّنے۔
ہندن نومبر اِرا ہزار بیست ءُ دو آن اپریل اِرا ہزار بیست ءُ سئے اسکان جسمانی سزا تیٹی چِھل ءُ سئے آن گیشتر تدینی مسّنے، طالبانک پنجا ءُ ہشت نیاڑی و دو سد ءُ ہفتاد ءُ چھار نرینہ و چُناتے کوڑا خَلکُنو۔
اگست اِرا ہزار بیست ءُ یک آن داسکان میڈیا نا آجوئی نا خلاف ورزی ٹی دو سد ءُ چِھل ءُ پنچ مقدمہ مسّنے، ارافتیٹ دزگیر کننگ و جسمانی حوال ئٹ خلّنگ نا سد ءُ سی معاملہ و شست ءُ یک خبر نویس ئے دزگیر کنّنگانے۔
طالبان نا کابینہ بیرہ امبل آتا بشخوکے، او الیکشن کمیشن، پارلیمانی کاریمک و امن نا وزارت ئے تحلیل کرینے۔
طالبانک چُنکا مسِن تے زور ئٹ برام کننگ آ مجبور کیرہ و طالبان نا بنّنگ آن پد صحت نا ادارہ ہم پد تمّوکے، افغان مسِن تا خودکشی نا کچ ئٹی ہم ودّیکی بسّنے۔
رپورٹ نا رِدئٹ اِرا ہزار بیست ءُ یک آن اِرا ہزار بیست ءُ دو نا یام ئٹ چُنا تا کاریم کننگ (چائلڈ لیبر) نا چھار ہزار پنچ سد ءُ نوزدہ تدینی مونا بسّنے۔
