بلوچستان نا کیہی ہنداتیٹی قلات، منگچر، سبی و نوشکی ٹی قوضہ گیر پاکستانی لشکر نا بھلو کچ ئس پیش قدمی کننگءِ۔ قلات منگچر ئٹی لشکر بمباری کرینے اراٹی زالبول و چُناتہ خلنگ مننگ نا حوالءِ۔
نوشکی نا مشی ہنداتیٹی اینو سُہب آن پاکستانی لشکر پیش قدمی کننگءِ۔
حوال آتا رد ئٹ پاکستانی لشکر نا بکتر بند لاری و پیدل کارندہ آک مشی ہنداتیٹی پیہانے۔
داکان بیدس قلات نا ہند منگچر ئٹی ہم لشکری کارندہ آتا بھلو کچ ئس سر مسونے، اراڑے پاکستانی لشکر نا ہیلی کاپٹر آک بمباری کرینو زالبول و چُناتہ خلنگ مننگ نا حوالءِ۔ سلاہ بند بندغ و لشکری کارندہ تہ نیام ئٹ جنگ ئنا ہم حوالءِ ولے دا رد ئٹ گیشتر حوال رسینگتنے۔
ایلو نیمہ آ ہنوکا دے سبی آن ہرنائی نا پاراغان لشکر نا بھلو کچ ئس ہند ئٹی پیہانے۔
سبی کینٹ آن پاکستانی لشکر بھلو کچ ئسیٹی ریل لاری ئٹ ہرنائی آن ہنانو۔ لشکر تون موٹر سائیکل و ایلو جنگی گڑاک ہم تدءُ۔
داکان بیدس کیچ ئنا ہنداتیٹی لشکر کشی نا حوال آک مونی بسنو۔ دا رد ئٹ لشکری کالخواہ تہ نیمہ آن لشکر کشی نا بابت ئٹ ہچو درشان ئس مونی بتنے۔
