جدگال ڈن (ڈی بلوچ) آ بیگواہ مروکا خوانندہ نعیم رحمت و ایلو بیگواہ مروکاتا آجوئی کن برجاء آ دھرنا ڈپٹی کمشنر، ڈسٹرکٹ چیئرمین و ڈی پی او ضیاء مندوخیل نا خاہوت آتون مزاکرات نا ایسری ٹی اسہ ہفتہ اِسکان بس کننگا ۔
اِستو انتظامیہ ڈی بلوچ آ بس خاہوت آتون مزاکرات کرے و بیگواہ تے اسہ ہفتہ سے نا تہٹی یلہ کننگ نا اِکرار کرے، داکا مُست آل پارٹیز کیچ ئنا وفد ہم خاہوت آتا ہِناسس و انتظامیہ تو ثالث نا دروشم ئٹ بیگواہ تا آجوئی نا جہد کریسس، اراڑے خاہوت آک و بلوچ یکجہتی کمیٹی اوفتا اِکرار آ اسہ ہفتہ سے کا برانز ئے پد تخار ۔
خاہوت آتا پاننگءِ کہ برانز ئٹ کسّ ئے خْوار کننگ یا تینا بندغاتے پریشان کننگ مسخت اف، بلکہ اوفتا پاننگءِ کہ اوفتا اُراتا بھلّا و تیناک بیگواہ کننگانو، سال گدرینگ آن پد ہم اوفتا بابت ئٹ سما تمپک۔ ننا خواست ہم ہندادے کہ اگہ او زندہ افّس تو اوفتا بنّنگ نا پِن آ ننے تولِفپس بلکہ پھاش پار ننے تاکہ نن تینا نیاڑی و پیرنگا لمّہ غاتے نن و دے روڈ آتا خْوار کپّن۔
او پاریر کہ نن و دے روڈ آتا خْوار مننگ شوق ئس اف،مجبوری سے۔ ارا بندغاک دا دڑد ئے خنانو او چارہ کہ دا انت ئسے ولے افسوز ءِ کہ ننا ہندا مجبوری ئے ہم گِڑاس بندغ ننا خلاف کاریم ئٹی ہتیرہ و زور ئٹ بیگواہی تے جواز تیرہ۔ ننے ننا تیناتے اینو ہتبو پدا نن ہچ ہم روڈ آتا خْوار مننگ کن بروفن۔ ہندا خاطر آن بلوچ اُلس آن خْواست کینہ کہ او ننا دڑد ئے سرپند مرسہ نن تون بننگ کپسہ گڑا ننا بر خلاف چلّوکا دروغ آتا ہم بشخ مفس ۔
