تُربَت شاپک نا ہند آ تُربَت آن کراچی کسر M8 آ برانز، زالبول برانزیک بیگواہ آ رحمت نا آجوئی نا خواست کریر ۔
ضلع کیچ نا ہند شاپک نا ہندی تُربَت یونیورسٹی نا خوانندہ نعیم ولد رحمت شاپک نا بیگواہی نا برخلاف اَسہ وار ئس پدا خاوت و ہندیک شاپک نا ہند آ ایم ایٹ کسر ئے بند کریر ۔
داکان مُست ہندا تُوو ئٹی بیگواہ آ ورنا نا خاہوت ہندا کسر آ برانز کرسا اونا آجوئی نا خواست کریر، ضلعی انتظامیہ نا یخین دہانی آ اوفک شش دے آن پد تینا برانز ئے ختم کریر ۔
نعیم ئے اِرا سال مُست تُربَت شہر آن پاکستانی لشکر دزگیر کننگ آن پد بیگواہ کرے ، ارا دائسکان مونی ہتنگ متنے ۔
تُربَت برانز ئنا ہند آن ہیت کرسہ نعیم رحمت نا ایڑ پارے کہ نعیم رحمت نا آجوئی کن اوفک کُل وسیلہ تے ہرفسہ برانز کرینو ، ہنوکا برانز ئٹی ڈپٹی کمشنر پنچ دے ئنا وخت خواہا نن برانز ئے ایسر کرین ولے ہچس متو مجبور مرسا پدا برانز آ کننگ اُن ۔
بلوچ یکجہتی کمیٹی نا وسیم بلوچ ہم دا برانز ئٹی اوار ءِ ، او خواست کرے کہ نعیم رحمت تون اوار ایلو بیگواہ مروکا بندغ آ تے مونی ہتیر ، اگہ نا دا تدینی تہ برخلاف اَسہ وار ئس پدا بلوچستان نا ہند آ تیٹی برانز مرو ۔
شاپک برانز ئٹی پین بیگواہ آ بندغ آتا خاہوت تیتون اوار ہندیک ہم اوار ءُ و تینا بندغ آتا آجوئی نا خواست کننگ ءُ۔
