خضدار ئٹی تراک ئٹ شہید مروکا ورنا جواد مینگل نا کاکا یونس مینگل ئے پاکستانی لشکر مسٹمیکو وار بیگواہ کرے۔
خاہوت نا پاننگءِ کہ جعفر آباد خضدار ئٹی اینو سُہب ئنا نُہہ بجہ آ پاکستانی لشکر پنچ لاری تون بس و یونس ئے اونا دکان آن دزگیر کرسا دریر۔
اوفتا پاننگءِ کہ دا مسٹمیکو وارءِ پاکستانی لشکر یونس ئے دزگیر کیک و سِزا تیک۔ اولیکو وار اِرا ہزار چھانڑدہ ٹی پاکستانی لشکر اودے بیگواہ کرے، اسہ تُو ئسے آن پد یلہ کننگا، پدا اِرا ہزار ہَودہ ٹی بیگواہ مس و پانزدہ دے آن پد یلہ مس ہندن داسا مسٹمیکو وارءِ کہ او بیگواہ کننگا۔
اوفک افسوز کرسہ پاریر کہ اسہ ہفتہ ئس مُست اونا ایلم نا مار جواد یوسف مینگل عمر فاروق چوک آ بمب تراک ئٹی جہان آن رخصت مس، خاہوت دائسکان ہمو غم آن پیشتمتوسس کہ اونا کاکا یونس ئے پدا بیگواہ کننگا، ارا خاہوت نا دڑد ئے کم کننگ نا جاگہ آ ودّفے۔
