ہاسٹل نا چھت آ تولوک ہانی تینا ایڑکو تے خوڑتی ئٹ بِننگ اس۔ غٹ ائید نا چھٹی تیکن خوشی کننگ اسر و چھٹی تیٹ تینا تینا علاقہ غا تیا ہِننگ نا تیاری تا بارو ئٹ پاننگ اسر۔ ہانی نا اُست گیمرینگوک اس، اودے گڑتی اس کہ او علاقہ غا ہنو۔ اوڑکن ہاسٹل راہ فرار نا اسہ آسراتی ئس اسک۔ او علاقہ غا ہِننگ خواہتوکہ، اُراغا ہِننگ خواہتوکہ۔ اودے گڑتی اس کہ او اسہ ہفتہ ئس اُراٹی امر گدارفو، دا ڈکھ و اذیت نا دیک امر گدرینگور۔ لمّہ نا پیرانگا ودار کروکا خنک، ایلم نا چُنا تا اُست ئے تل تروکا سوج آک، باوہ نا بیوس انگا دروشم۔ اونا جند ئنا شار ئٹ ہم یونیورسٹی اسک ولے او دا ڈکھ آن نرنگ کن شال آ خواننگ کن بسس۔
ایڑکو تیان اسٹ اوڑان سوج کرے، “ہانی ہلہ نی پاتوس نی عئید آ امرو پُچ کرینُس، نی تو ننتون بازار آ ہم بتوس، عئید نا چھٹی تو اسہ ہفتہ اسے ولے نن دہ دے آن پد برون، نی اخس دے آن پد بروس؟” ہانی گیمرینگوکو بشخندہ ئس جوڑ تیا ہیس، “ سما اف داسکان ہچ فیصلہ کتنُٹ۔” اونا اُست پارے کہ ای دافتے پاو ای اسہ ہفتہ ئس ہم اُراٹی گداریفِو بھاز ءِ، کنا وس ئٹ مرے تو ای اسہ ہفتہ کن ہم اُراغا ہنپر۔ ولے پیر انگا لمّہ باوہ۔۔۔ ایلم نا چُناک۔۔۔ کن کہ کسر ہروک مرور۔۔۔
اونا اُست ئٹ خیال بس کہ عئید نا دے مسلمان تیکن خوشی نا دے اسے۔ جہان ئٹ مسلمان امت عئید نا خوشی تیٹ اختہ مریک۔ پوسکنو پُچ بینرہ، زالبولک سینگار کیرہ، چاگڑدی حوالکاری میڈیا غا عئید مبارک نا ہیش ٹیگ تون جنسار شنگ کیرہ، چُناک خوشی آن گل و بال مریرہ و عئیدی مُچ کیرہ، اندا ہڑ دڑ مریک کہ دیر بھاز عئیدی مُچ کرینے۔ اسٹ ایلو ءِ عئید مبارکی ایترہ، حق آتے بشخفرہ۔ و انتئے عئید مبارکی تفس، اوفتا عئید آک اریر ہم تو مبارک ءُ۔
ولے نن۔۔۔ بلوچستان نا بھاتیک۔۔۔ پوسکنا پُچ ننے دوشہ غان بار ڈنگ خلیک۔۔۔ بیگواہ تا نیم جنوزانک۔۔۔ تولوک ودار کروکا دشتاک، ہرا ودار کرسا نیمہ وہی ئے سر مسنو و ہرافتا خُشک کرّی مسنو۔۔۔ شہید آتا چُناک۔۔۔ ایڑ لمّہ غاتیکن سینگار اُست کش ءُ جاتو اسے۔۔۔ چاگڑدی حوالکاری میڈیا غا عئید مبارک نا ہیش ٹیگ نا جاگہ غا بیگواہ تا بابت ئٹ ہیش ٹیگ آک ٹرینڈ کیرہ۔۔۔ چُناک عئیدی ہلنگ کن باوہ غا تے پٹیرہ ولے باوہ غاک زندان تیٹ بندی ءُ یا گل زمین ئٹ گُڈی ہند کروک ءُ۔۔۔ دا غٹ ئنا حق آک ریاست نا کوپہ غا تیاٹو، ولے ریاست حق تروک ئس اف حق پھلوک اسے، ظالم اسے، زوراک اسے، کوزہ گیر اسے و نوآبادکار اسے۔
او تینا خیال آتیٹ پین کُڑمب ہنا، اونا زہن ئٹ بس اندا ہیت اسک کہ بلوچستان ئٹ زوراکی ئٹ بیگواہ کننگوک بندغ آتا خاہوت آک تینا ہر عئید ئے کسر تیا برانز کرِسا گدریفِرہ۔ اوفتا اُرا تیٹ کس پوسکنو پُچ بینپک، زالبولک سینگار کپسہ، چُناک خوشی کپسہ۔ ایڑک، لمّہ غاک، چُناک برانز کرِسا کسر تیا پیشتمرہ۔ او خوشی کیر ہم تو امر کیر، عئید کیر ہم تو امر کیر، عئید مبارکی ایتر ہم تو امر ایتر، کس ئنا جغر نا ٹکر ٹارچر سیل ئٹ بے بندغی ءُ بےدادی سگے اونا ایڑ لمّہ غاک، چُناک، لمّہ باوہ امر عئید کیر ؟ اوفتا عئید امر مبارک مننگ کیک ؟
او ایڑکو تا کچاری آن بے پام مرسا تینا اذیت تروکا خیال آتیٹ گُم اسک کہ ایڑکو تیان اسٹ اونا کوپہ غا دو ئے خلِسہ پارے، “ ہانی نی بِننگ اُس یا نہ۔” ہانی سٹِسہ اوڑا سوج کروک انداز ئٹ ہُرا۔ ایڑکو تہ فریشان مرسا پارے،” ہانی زیبا انت مس؟” ہانی زور ئٹ بشخندہ کرے ولے اونا بشخندہ گیمرینگوک اس،” ہچ متو، بس کنے تُغ ہلنگ ءِ۔ ای کاوہ خاچِوہ نُم تینا وڑا ببو۔” انداخس پارِسہ ہانی بش مس و ایڑکوک بے پُہی ئٹ اودے ہُننگ اسر ایسکان کہ او اوفتا خن تیان اودیم مس۔
او ایڑکو تا کچاری آن نرِسہ تینا کوٹی ٹی بس، ولے تینا زہن ئٹ کاٹم ہرفوکا بے مہار آ خیال آتیان نرنگ کتو۔ تینا جاگہ غا لیٹا و چھت آ وے خننگوکو ٹک ئسے آ خن تے سخت کرسا ٹک خلک کہ دا ظلم و زوراکی نا تالان آ مون آ جھمر، استحصال و بےدادی آ خن تے تر کرِسا امر ای لمّہ باوہ ئے عئید مبارک پاروٹ؟ ایلم نا چُنا تے امر دلاسہ ایتوٹ۔” اونا خیال آک اودے سہمار نا وڑ ڈنگ خلنگ اسر، “زوراکی نا بیگواہی اسہ بندغ ئسے نا زند ءِ امر زیمی کیک، اونا خاؤت نا زند امر زیمی مریک دا نا اندازہ ءِ کننگ کن یا تو ہمو دڑد آن تینٹ گدرینگوئی تمک یا تو راجی شعور و چاہنداری، غلامی نا مارشت بکار مریک۔”
او خن تے تر کرے و اونا خن تیان خڑینک آک زرِسہ ہنار۔ او خن تے ملا و فون ئے ہرفے، چاگڑدی حولکاری میڈیا غا تینا ایلم نا بیگواہی نا بارو ئٹ پوسٹ ئس کرے، و اینگان اونا خن تیان خڑینک آک وہِسہ موبائل نا سکرین آ تمنگ اسر۔ تینا پوسٹ ئے کننگ آن گڈ اونا نظر پین خبر ئسے آ تما ہراٹی زوراکی ئٹ بیگواہ کننگوک بندغ آتا خاہوت آک عئید نا دے شال ئٹ برانزی ریلی ئس کشنگ نا پڑو کریسر۔ او خن تے تر کرسا آستونک ئٹ خڑینک آتے ساف کرے، و باوہ ئے وائس میسج ئس کرسا پارے، “سلام باوہ جان، انت حال ءِ نُما جوڑ اُرے مخلوق آلم کُل جوڑ ءُ۔ ای دا عئید آ اُراغا بننگ نا جاگہ غا شال ئٹ بیگواہ غا بندغ آتیکن مروک برانز ئٹ بشخ ہلنگ نا فیصلہ کرینُٹ، ای بے توار اُراٹی تولنگ نا جاگہ غا ایلم کن دگ آتیا پیشتمِسہ توار بڑز کننگ نا فیصلہ کرینُٹ۔ باوہ جان کنے موکل ایت کہ ای ایلم کن پین ہچ آخہ تو انداخس کننگ کیو۔”
واٹس ایپ آ وائس میسج باوہ ئے سر مس، اِرا ٹک مس، ٹک آک نیل مسر، باوہ نا ورندی ہم بس، “جوانے کنا گودی، کر ایلم کن انت کہ نا وس ئٹ ارے۔ ” او ہم اُست جم مرسا موبائل ئے تخا و خاچنگ نا کوشست کرے۔ ہرے اسکان تینا بے مہار آ خیال آتون مون تس، آخر تُغ ئنا پڑدہ اونا زہن ئے پلویڑ کرے۔
