‘وائس فار بلوچ مسنگ پرسنز’ نا بھلُنی ٹی بیگواہ آ بلوچ آتا آجوئی کن شال ئٹی برجاء انگا ‘بین برانز’ گدان ئے اینو پنچ ہزار چھار سَد ءُ دہ دے پورَو مس۔ نیشنل پارٹی نا صوبائی جارکش علی احمد لانگو، بی ایس او نا مُسکوہی چیئرمین زبیر بلوچ، اصغر بلوچ و بشیر بلوچ گدان آ برسا اواری نا درشانی کریر۔
وائس فار بلوچ مسنگ پرسنز نا وائس چیئرمین ماما قدیر بلوچ پارے کہ بلوچ اُلس آن خْواست کیوہ کہ او سی ٹی ڈی، ایف سی و ایلو ریاستی ادارہ آتیٹ ہِچّو وڑ ئنا کمک کننگ و اوفتے چائنداری تننگ آن پہریز کیر انتئے کہ ایف سی و ایجنسیک ہندا چائنداری تے بلوچ راج ئنا خلاف کاریم ئٹی ہتیسہ اودے نسخان تیرہ۔
ماما قدیر بلوچ پارے کہ ہندا سوَب آن ہَزارا بلوچ ورناتا لاشاتا رسینف و ہزاراتا زور ئٹ بیگواہ کننگ آن پد بلوچ راج ایف سی و ایلو پاکستانی ادارہ آتا کمک نا پِن آ چم بازی تیٹ بروف، بلوچ راج مدام بینگُن رہینگ ئے سَہانے ولے تینا دشمن آن ہچ وخت ہم خیرات خْواتنے۔
