بارکھان بلوچستان ئٹی گیشتر سرکاری اسکول آتا بندی نا پاننگانے۔
ہندی بندغ آتا پاننگءِ کہ بارکھان ٹی بغاؤ، تکھڑا، عیشانی، ناہڑکوٹ، چھپر، مہمہ، صمند خیل و چچہ نا گیشتر اسکول آک ہُرے آن بند ءُ۔ نرینہ و نیاڑی استاداک ساڑی افّس۔
پاننگ مننگءِ کہ تیوعہ بارکھان ئٹی نیمہ آن زْیات اسکول آک بند ءُ ، ہَرا اسکول آک یلہ ءُ اوفتا ہم نیمہ آن زْیات استاداک بفسّہ۔
حوال آتا رِدئٹ، دا کُل تعلیمی محکمہ نا دُو آن مننگ ءُ، اراٹی چُناتا بروکا وخت بےشون مننگ ٹیءِ۔
اُلس حلقہ آتا پاننگءِ کہ ساڑی آ حکومت کُل بےبروکا استاداتا خلاف گام ہرفسہ بارکھان نا بند انگا اسکول آتے مَلفِر تاکہ داڑے چُناک خْوانیر و علاقہ نا شون اکن کاریم کننگ کیر۔
اوفتا پاننگءِ کہ بلوچستان حکومت نا نیمہ آن تعلیمی نظام ئے گچین کننگ کِن بلوچستان نا وزیر اعلیٰ مُسہ ہزار استاداتا اسکول آتا بےہِننگ نا سوَب آن کاروائی نا پاریسس ولے اوکا پد ہم دائسکان بارکھان ئٹی اسکول آتا بےبروکا استاداتا خلاف ہِچو گام ئس ہرفنگ متنے۔
اُلس حلقہ آک بلوچستان نا وزیر اعلیٰ و ضلعی انتظامیہ آن خْواست کرینُو کہ بند اِنگا اسکول آتے ملفنگے و استاداتے ہتنگ مرے۔
