نوشت: درناز رحیم
زرمبش نوشتانک|
او شام زینب ہرُے اسکان تُنگان ہنتو، و لمّہ نا ہم اندا حال اس۔ سہب تون لمّہ سما کرے تو زینب خاچوک اس۔ او اسیکہ تو فریشان مس کہ زینب انتئے بش متنے، مگہ اسکول آ ہنپک؟ ولدا زینب ئے ٹونہا، “ زینب۔۔۔ زینب کنا گودی اسکول آ ہُرے تمو نے اینو بش متنُس ہلہ۔ “ زینب کمبل ئے مون آن ہرفے، “ سما اُٹ لمّہ۔” لمّہ تینا کمبل ئے تینا زی آن مُر کرسا بش مس، “ گُڑا مگہ اسکول آ ہنپیسہ کنا ساہ، تیار مفیسہ۔” زینب ہم بش مس توس، “ لمّہ ہلہ فیس۔۔۔ فیس اراکان ہتون؟ ایہُن ہم پگہ آن اسکول ئٹ الوفس کنے، اینو ہم اسکول ئٹ کنا گڈیکو دے مرو، اوڑان جوان اف کہ اینو ہم ہنپر؟ ہنوٹ اوڑے بیرہ تینا بے شرفی ئے کرفوٹ۔” لمّہ زینب ئے ہچ دُن مایوس خنتوسس، تینا بے وسی و زینب نا مایوسی آن اودے بھاز ڈکھ مس ولے او زینب نا رہا تولِسہ اودے بھاکر کرے و کاٹم آن تہ دروت ہلِسہ پارے، “اینو اسکول آ ہن کنا گودی، پگہ نا گڑتی کن ای اریٹ۔ نن تینا اینو ئے جوانی ئٹ گدریفن، کُل وارخواہی تے آزمائفن، پگہ نا پگہ ہرون۔” زینب ہم فرمانبردار آ چُنا آن بار بش مس تیار مس و اسکول آ ہنا۔
اسکول ئٹ اونا زہن خواننگ ئٹ الو، اونا زہن ئٹ بس اندا ہیت اس کہ اینو اسکول ئٹ کنا گڈیکو دے ءِ۔ چُھٹی مس او تینا کتاب آتے مُچ کرسا بستہ ٹی شاغا و کلاس آن پیشتمسہ راہی مس۔ اسکول نا گیٹ اسکان سر مس کہ نا گمان آ پدان کس توار کرے، “ زینب گودی۔” زینب ہبکہ مرسا پدی چک خلک۔ پدان نوہمی و دہمی کلاس نا فزکس نا استاد بننگ اس۔ زینب پُہہ متو کہ استاد رفیق اودے انتئے توار کننگ ءِ۔ او وے پُہی ئٹ تینا جاگہ غا سلیس۔ استاد رفیق بشخندہ کرسا اونا رہا بس و مہر ئٹ سلام تس، اونا لہجہ ٹی انداخس مہر اس کہ اونا مہر ئٹ تروکا سلام اونا جوڑ تیا اسہ پنوکو بشخندہ ئس ہیس۔ استاد رفیق دا اسکول نا کُل آن مہروان آ استاد اس۔ نہ بیرہ دا اسکول نا بلکن دا شار ئٹ ہم تینا اُست خُلکنی و مہروانی کن پِنی اس۔ او استاد ئے شرف ترسا وعلیک سلام پارے۔
“انت حوال ءِ گودی، اُراٹی کُل جوڑ ءُ۔ فیس ئنا بست و بند مس؟ “استاد زینب ئے خوڑتی ئٹ ہُرسا سوج کرے۔ زینب نا جوڑ تیا تالان ہمو پنوکا بشخندہ ہم اسہ وار تو گُم مس، او بھاز ملامت مس کہ ای امر استاد ئے پاو کہ کنتو فیس اف، و پگہ آن کنا اسکول نا کسر بند ءِ۔ او کاٹم ئے شیف کرے ولے گیمرینگوکا توار ئٹ ورندی تس،” جی آخہ استاد، پگہ آن اسکول آ بروفٹ۔“ استاد بشخندہ کرسا زینب نا کاٹم آ دو ئے تخا، “ دیر پائک کہ نی پگہ آن اسکول آ بروفیس، نی دا اسکول نا کُل آن لائخ آ چُنا تیان اسٹ اُس، ننا راج ئے نا کون ءُ لائخ ءُ چنا بکار ءِ۔ ای نا اِرا تُو ئنا رہینگوکا فیس تے تسونٹ، نی اسکول ئے الِپیس۔ “
زینب ئے دا ہیت ئنا اومیت الو او اسیکہ ہبکہ مس اونا زہن ئٹ ہچو سوج یا ہیت بتو، او حیران آ خن تیٹ استاد ئے ہُننگ اس۔ استاد ہم اونا حالیت ئے پُہہ مرسا تینٹ ہیت ئے برجاء تخسہ پارے،” گودی ارا تُو ئنا فیس داخس بھلو ہیت ئس اف کہ ای تننگ کپر تہ۔ کنے سما ءِ نما لمہ نم کن اخس خواری کشنگ ءِ و نی دا اسکول نا لائخ آ چُنا تیان اسٹ اُس، نی کڑزپیسہ کہ پیسہ نا نیستی نا سوب آن نا خواننگ ئٹ ہڑاند برے، یا اسہ لائخ ءُ چُنا ئسے تون دنو بے انصافی مرے۔ ننا بد بختی ءِ کہ ننے آ نوآبدکار ئسے نا تعلیمی بست و بند چٹی مسنے، ہراڑے نن تینا راج ئنا زنک ءِ حقیقی تعلیم تننگ تو مُر، نوآبادکار نا ٹہفوکا تعلیمی بست و بند ئٹ ہم جاگہ تننگ کپنہ۔ نن تینا راج ئنا چُنا تتون نوآبادکار آن ہم گندہ و روشت تخنہ۔ نہ تینے انسان سرپند مرینہ نہ تینا راج ئنا زنک ءِ۔ نن تینے شوان سرپند مرینہ و اوفتے بُزگل۔ ننے سما اف کہ اسہ استاد ئسے نا راجی ذمہ واریک انت مریرہ۔” زینب کن اونا ہیت آتے پُہہ مننگ دا وختا بھاز کبین اس، ولے اونا ارواہ ئٹ امیت نا روشنائی ئس گروشک تننگ اس کہ استاد اونا بھاز بھلو ویل ئس مُر کرینے۔ او داسا ہبکہ الو، ولے سما اف انتئے او ہچ ہیت کننگ کتو، او گلوتہ ہلسہ مون ئے شیف کرے و اسہ آڑسندہ ئس کشِسہ تینا خڑینک آتے تورے۔
“ ولے استاد ای نما تھورو نا بدل ءِ امر ایتوٹ۔” خوشی، ہبکئی، و بے پُہی نا اوڑدئی و چیڑگن آ جزبہ آتا زہم آن اونا توار لڑزنگ اس۔ “دیر پائک کہ ای نے آ تھورو ئس تخنگ اُٹ ؟ نی کڑزیسہ کہ نا اسہ استاد ئس نیتون دنو چنکو کمک ئس کے۔“ زینب نا است ئٹ استاد رفیق کن مہر و احسان مندی نا اوڑدہ ءُ مارشست ئس ودی مس ہرادے او لوز آتیٹ درشان کننگ کتوکہ، و بیرہ کاٹم ئے شیف کرسا چُپ مس۔ ” استاد رفیق مہر ئٹ اونا کاٹم آ دو ئے تخا، “ ای اسل خواہپرہ کہ کنا قوم ئنا دنو لائخو گودی ئس تینا تعلیم نا حق آن بیرہ پیسہ نا نیستی نا سوب آن پد تمے۔”
انداخس پارِسہ استاد رفیق زینب آن موکل کرسا راہی مس، زینب ہم بیرہ کاٹم ئے سُرفِسہ اونا موکل نا ورندی تس۔ اودے باور بننگ الو کس اوڑا داخس مہروان مننگ کیک، او اندا سرپند مسکہ کہ دنیا ٹی مسکین آ بندغ کن ہر اسہ بندغ ظالم ءِ، ہر اسہ بندغ خدا آن زیات اونا خدا جوڑ مننگ نا کوشست کیک، دن امر مننگ کیک کہ کس ئس بیدس غرض آن دن مہروان مرے۔ او استاد رفیق ئے ہُننگ اس، اسہ پوسکنو نظر ئسیٹ۔ اودے اسہ پوسکنو بندغ ئس نظر بننگ اس، بلکہ بندغ نا دروشم ئٹ اسہ ملائک ئس ہرا اونا غٹ سوج آتا ورندی ئے تننگ کن بسس۔ او ہُننگ اس ایسکان کہ استاد تینا موٹر سئیکل آ سوار مرسا رادہ مس و اونا خن تیان اودیم مس۔
برجاء۔۔۔
