حمیرہ بی بی کوش کیس کوئٹہ ٹی خاہوت نا برانز ، اونا اَرغ نا اُرانا بندغ آتا برخلاف کاروائی نا خواست کننگا۔
بلوچستان نا ضلع ڈھاڈر ئٹی ارغ و اونا اُرا والا تہ دُو آن خلنگ مروکا حمیرہ بی بی نا خاہوت کوئٹہ ناہاکی گراؤنڈ آ برانز کرے ، برانز ئنا سوب آن ترین اسپتال آن خُڑک ٹریفک نا نظام متاثر مس۔
برانزی تہ پاننگءِ کہ معصوم بی بی حمیرہ ئے ناحق خلکُنو ، ایس پی کچھی ڈوہدار آ تا بیٹھک آن بریک ولے اوفتے دزگیر کپک ، ایڈوکیٹ حکومت ، وزیراعلی و چیف جسٹس بلوچستان آن زوت آن
زوت ڈوہدار آتے دزگیر کننگ نا خواست کرے ۔
اوفتا گیشتر پاننگءِ کہ ایس ایچ او ایف آئی آر نوشت کرے ہمو ایس ایچ او ئے ٹرانسفر کریر و پدا اودے عہدہ آن کشار ، ڈوہدار آک طاقتور ءُ کہ اوفتے کس دزگیر کننگ افس اوفتا برخلاف کاروائی کننگ کن کس تیار اف نن دانگا فاتحہ خوانی کن تولوک اُن و اوفک سوشل میڈیا آ عکس شنگ کننگ ءُ ۔
برانزیک خواست کریر کہ ڈی آئی جی نصیر آباد و ایس ایس پی کچھی ئے کشیسہ ڈوہدار آتا برخلاف زوت کاروائی کیر وحمیرہ بی بی نا کوش ئٹی اوار کُل ڈوہدار آتے سزا تننگ مرے ۔
