بلوچستان نا ہند دکی ٹی بیست ءُ سے فروری آ بیگواہ مروکا نُہہ مزور یانزدہ دے گِدرینگ آن پد ہم یلہ متَوس۔
ضلعی انتظامیہ و ایف سی نا اُست تِننگ آن پد ہم بیگواہ تے کِن ہچّو آپریشن ئس کنّنگتنے۔
بیگواہ آ مزور تہ آجوئی نا توار بلوچستان اسمبلی اِسکا سرمس۔
بیگواہ تہ خاہوت آک اوفتے پَٹّنگ ئٹی دمدرینگانو۔
بیست ءُ سے فروری آ ناصر برادرز کول کمپنی و اتفاق ناصر کول کمپنی و ناصر کول کمپنی گل غنڈ ایریا آن نادُرست آ سِلاہ بند بندغاک نُہہ مزور تے بیگواہ کریسُر۔ ارافتیٹ اِرا مزور مومن خان ولد روزی خان و حمداللہ ولد سدو خان تعلق افغانستان، چوکیدار جوہر خان ولد سلیم قوم شادوزئی تعلق یارو شہر، دکی آن شاہ خان ولد بہادر و باچا خان ولد خیبر بدر قوم یوسفزئی تعلق خیبرپختونخوا شانگلہ ہندن ایلو چھار مزور غفور باتوزئی، یمایوں جلالزئی، شکور میرزئی و قائم شیخ نا تعلق قلعہ سیف اللہ ہندیءُ۔
پوغ ئنا کاریم کروک و مزور تِہ وار وار بیگواہ کننگ و تڑی تنّنگ و پرچی بشخینگ آن پد شست آن بھاز کوئلہ دُھون تیٹ کاریم کروکاک کاریم ئے بند کرسا ہِنار۔
