نوشت: درناز رحیم
زینب وردی تے بدل کننگ آن گڈ دالان آ ہنا، ایڑ ایلم و لمّہ تولوک ارغ کُننگ اسر۔ زینب ایڑ ایلم تیٹ کُل آن چُنکا اس۔ اوڑان بھلو اسہ ایڑ ئس و اسہ ایلم ئس اس۔ زینب نا ودی مننگ نا اِرا توُ آن پد اونا باوّہ روڈ شکست ئسے ٹی جہان ئے الاسس، ہراکان گڈ اونا لمّہ زند ئنا شیفی بُڑزی تے تیر کرسا اوفتے بھلن کننگ اس۔ زینب نا ایڑ و ایلم تو خواننگ کتویسر ولے داسا اونا لمّہ تینا چُنکا مسڑ (زینب) ئے خوانفنگ کن دے و نن ئے اسٹ کریسس، تاکہ منَہ پیسہ دو ٹی برے تو او زینب ئے خوانفنگ کے۔ او پوریائی ءُ پُچ گھنڈاکہ، مشین آ پُچ تر شاغاکہ، ٹھپہ خلککہ، انت کہ اونا دو آن بسکہ او کریکہ۔ او تینا دمدرینگ ئے ہم ہُتوکہ۔ اونا زند ئنا بس اندا مسخت اس کہ زینب ئے خوانفِہ و زینب تینا زند ئٹ اسہ جوانو جاگہ ئس سر مرے۔ اودے تینا بھلا مسڑ و مار کن ہم باز ارمان کریکہ کہ او اوفتے خوانفنگ کتو۔
غٹ دالان ٹی تولوک اسر، زینب ہم بے توار بس توس و وے است خواہی ئٹ باخو ئے باٹی کرے۔ زینب ایہُن ہم چُپ ءُ چُناس اس، ولے لمّہ ئے مارشت مس کہ اینو زینب ہڑدے آن زیات چُپ و مونجھا ءِ۔ او خوڑت ہُرا تو اسہ وار تون اونا اُست شیف تما، زینب نا خن تا خیسنی و پِریس آن چاننگاکہ کہ او ہوغانے۔ لمّہ نا گُٹ آن باخو دھڑنگتو و تاس ئس دیر ئنا کُنیسہ بش مس دالان آن پیشتما۔ زرہ سے آن گڈ زینب ہم دالان آن پیشتما و گیڈ ئنا کنڈ آ ہِننگ اس۔ لمّہ پیشن توت ئنا رخت ئنا سیخا ٹی تولوک اس، زینب ئے توار کرے، “کنا ساہ داڑے بر۔” زینب ہچ ہیت کتو و ہِنا لمّہ نا رہا توس۔ لمّہ مہر ئٹ اونا کاٹم آ دو ئے تخا و سوج کرے،” انت مسنے زینب، نی ہوغانس؟” لمّہ نا سوج تون اوار زینب نا خنک غل غل کریر، گلوتہ ہلِسہ پارے “اینو ولدا کنے آن فیس خواہار، کلاس آن ہم کشار کنے، مُچا دے پیشن تولوک اسٹ۔ پرنسپل کُل استاد آتے پارے کہ زینب ئے اینو کلاس ئٹی الیپیرے و کنے پارے کہ پگہ تینا اُراغان اسٹ ئس ہتیس دفتر آ۔” دا ہیت آتے کننگ تون اوار اونا خڑینک آک کلک آتیٹ زِرار، لمّہ ہم فریشان مس ولے زینب نا مونا پاش کتو، اودے اُست بڈی تس کہ او پگہ برو پرنسپل نا دفتر آ۔
تیبہ نن لمّہ تُنگان ہِنتو، زرس اُست تہ رغزینگاکہ وا سما کریکہ۔ سُہب ئنا پیہُنی تون زرس تُنگان ہناسس کہ اسکول نا وختا سما کرے تو زینب وردی بینوک تیار گیڈ ئنا باء آ تولوک اس، لمّہ خنا زینب کتاب دو ٹی گڑاس خواننگ ءِ، ولے اندن گمان مسکہ کہ اونا زہن خواننگ ئٹی اف، او پین گڑا سے نا گڑتی ٹی ءِ۔ لمّہ چائسکہ کہ اونا گڑتی اونا فریشانی انت ءِ۔ لمّہ ہم بش مس بیرُم تے مُچ کرے تیار مس و زینب تون اسکول آ ہنا۔
پرنسپل نا دفتر ئٹی تومکا لمّہ مسڑ ٹیبل نا دامون آن سلوک اسر، ٹیبل نا ہیمون آن پرنسپل کرسی آ تولوک تومکا دو تا سروشک آتے ٹیبل آ خلکسس و لمّہ تون ہیت کننگ اس، ”آئی اخس وخت نن نا چُنا ئے مفت خوانفون۔ دا تُو ئنا دوانزدہ دے گدرینگانو اینو سینزدہمی دے ءِ۔ مالو نا تُو ئنا ہم فیس تتنُرے۔ فیس تننگ کپیرے گُڑا تینا چُنا ءِ سرکاری اسکول ئسے ٹی خوانفبو۔” لمّہ کن اونا ہیت آک زار آن ہم خرین اسر، ولے او بیوسی ئٹ دا زار ئنا گُلم ئے ہم گُٹ آن ہیمون کرے۔ “ ای وڑ نہ وڑ ئسیٹ تینا چُنا نا فیس تے ایتوٹ۔ سرکاری اسکول تا حالیت ئے نُم خنانُرے اوڑے کنا چُنا کن ہچو آخبت ئس اف، ای زینب کن باز بھلو تُغ خنانُٹ، کنا چُنا ہم نُما موناٹے او اخس لائخو چُنا سے مُدام اولیکو نمبر آ بریک امتحان تیٹ، اسہ وختس ہم۔۔۔” پرنسپل اونا با آن ہیت ئے پُھلِسہ پارے، “ اونا پوزیشن ننے انت کاریم ایتک آئی۔ اولیکو نمبر آ برے یا آخریکو۔ ای نُمے پین اِرا دے ئنا وخت ایتوہ اگہ فیس تننگ کتویرے گُڑا زینب ئے اسکول آ راہی کپیرے۔”
لمّہ و زینب بیوسی ئے پلّو آ تفِسہ پرنسپل نا دفتر آن پیشتمار۔ زینب نا اُست پاریکہ گُٹ ئنا پھُر آ ہوغے، تینا بزگی ئے خڑینک آتیٹ کُل ئے شان ایتے و لمّہ نا بے شرفی ئے کننگ کن کتاب آتے پرسپل نا دفتر ئٹ چغل ایتِہ و پائے کہ ای خوانپرہ، کنے کتاب آتا گرج اف، کنے ہچ ئسے نا خواست اف، بس کنا لمّہ نا بے شرفی ئے کس کپ۔ ولے او چائسکہ کہ دا گڑاغان لمّہ نا اُست اخس ہسون مرو۔ زینب ئٹی دیچا اراکان داخس سگ بسس کہ تینا خڑیک آتے تورے۔ لمّہ اوکان زیات سگ ئٹ تینا اُست ئٹی ودی مروکا طوفان ئے توننگ اس۔
تومکا اُراغا بسر، ہڑتوما اسٹ ایلو تون دا بارو ئٹ پین ہیت کتور، نہ اُراٹی ایلوفتتون دا بارو ئٹ ہیت کریر، نہ کہ کس سوج کرے۔ دا دے ہم اندا فریشانی ٹی ہِنا، دے کھیئلینگ نا وختا زینب ڈن آ تولوک اس۔ او سینہ ٹی کیہی سوج گھڈ کریسس، ولے او پُہہ مننگ الو کہ دا سوج آتا ورندی دیر تون مرو۔ دیر ارے کہ اونا زند ئٹ اسہ ملائک ئسے نا وڑ برے و اودے دا سختی تیان کشے، یا کم ئس کم اونا سوج آتا ورندی ئے ایتے۔ وختس او دے ئے کھئیلنگ آ ہُننگ اس تو اُست ئٹ دے تون تران کرِسہ پارے “ نی مچا جہان ئے روشنائی کیسہ وا ہم کنا زند ئٹ اوندھائی آن بیدس ہچ اف، ای تہارمئی آن خُلیوہ، ای دلیر مننگ نا کوشست کیوہ ولے ای دلیر ئس افٹ، بندغ آک کن کہ ارمان کپسہ، ولے نی انداخس کنے آ تھورو ئس تخ کہ کنا و کنا لمّہ نا کُل ڈکھ آتے تینتو در۔ تینا پگہ نا دے ٹک تون نن کن خوشی و جارات ہتہ۔” انداخس پاننگ تون اونا خن تیان خرینک آک وہیسہ کلک آتیا تمار و او خن تے تر کرے۔
برجاء۔۔۔
