سندھ ضلع سکھر آن بیگواہ مروکا چُنکا مسڑ پریا کماری نا آجوئی کِن ڈیرہ مراد جمالی بلوچستان ٹی ہندو برادری و کاروباری مخلوق برانزی ریلی ئس کشّار۔
چُنکا پریا کماری نا آجوئی کِن برانز ئٹی سول سوسائٹی، چاگڑدی، سیاسی بندغاک و اقلیتی برادری بھلّو کچ ئسیٹ بشخ ہلک۔
ریلی نا بھلنی ئے ہندو پنچائیت نا رہشون مکھی مانک لعل و سیٹھ تارا چند کریر، برانز ئٹی انجمن تاجران نا کماش کامریڈ تاج بلوچ، جماعت اسلامی یوتھ بلوچستان نا صوبائی جنرل سیکریٹری و انجمن تاجران نا سیکریٹری لیاقت علی چکھڑا، ہولسیل نا صدر میر جان مینگل، مولانا نواب الدین ڈومکی، خان جان بنگلزئی و ہرپالداس اوار اسُر۔
برانزیک پلے کارڈ ہرفسہ پریا کماری نا آجو کن نعرہ خلکُر۔
برانزی تیتون مکھی مانک لعل، تارا چند، میر جان مینگل، تاج بلوچ تْران کرسہ پاریر کہ داخس وخت گِدرینگانے ولے پریا کماری ئے سندھ حکومت یلہ کرفیفنگ کپک ارا اونا نزوری ءِ۔ چُنکا چُنا تہ بیگواہی ہر دے نا گِڑاس مسّنے داسا سندھ حکومت ئٹی اقلیت آتا رہینگ سختءِ کہ کس ئس سندھ ئٹی بچّنگ کپّک، دُزّی، پُھلنگ و خلّنگ کھسفنگ سندھ ئٹی لس مسُنے۔
