بلوچستان نا ضلع حب آن پاکستانی لشکر ٹیچر ئسے زوراکی ئٹ بیگواہ کرے ۔
بہروز دلاوری پنی ءُ ورناس ئے ہنوکا شام پاکستانی لشکر و ڈھکوک ادارہ آ تا کارندہ آک اونا اُرا آن زوراکی ئٹ تینتو دریر ، اوکان پد اونا ہچو حوال ئس اف۔
بہروز دلاوری نا خاوت نا پاننگ ءِ کہ اودے ہنوکا شام 2:30 آ امیر آباد حب چوکی آن پاکستانی لشکر ایف سی و سول وردی بینوک بندغ آک اونا اُرا آن بیدس عدالت آن ہرفیر و نا دُرست جاگہ سیا دریر۔
دا تدینی ہموخت مس اراوخت حب آن خُڑک کراچی آن پاکستانی لشکر و ڈھکوک ادارہ آ تا دو تیان زوراکی ئٹ بیگواہ مروکا اِرا بندغ شعیب و زمان نا سُم خلوک جون آک ملار ۔
کراچی نا ہند لیاری سنگھولین ئنا ہندی ورنا تے اگست 2023 ئٹی زوراکی ئٹ بیگواہ کنگاسس ۔
بی این ایم نا ادارہ پانک چاگڑدی ویب سائٹ ایکس آ تینا اَسہ درشان ئسیٹی پارے کہ اوفتے 17 اگست 2023 آ پاکستانی لشکر زوراکی ئٹ بیگواہ کریسس ، شعیب نا خاوت ئے 27 مارچ آ پاکستانی انٹیلی جنس ایجنسی تا نیمہ آن کال بس کہ او کراچی نا اسپتال ئسیان جون آتے دیر ۔
مَنہ دے تیٹی بلوچستان آن زوراکی ئٹ بیگواہ آ 5 بندغ آک آجو مسُنو ارافتیٹی ہندا تُوو لاہور آن زوراکی ئٹ بیگواہ مروکا سرگودھا یونیورسٹی نا خوانندہ خدا داد سراج اوار ءِ ۔ 24 مارچ آ مستونگ آن اُراسیان بیگواہ مروکا امیر حمزہ نا آجوئی، ہندی و خاوت نا بیست ءُ چار گھنٹہ اسکان کسر آ برانز کننگ نا سوب آن ممکن مس ۔
دا وخت پین بندغ زوراکی ئٹ بیگواہ مروکا ارافتیٹی مستونگ آن اِرا بندغ و خضدار آن اِرا ایلم تہ زوراکی ئٹ بیگواہی تُدءِ ۔
بندغی حق آ تیکن تورا بُڑزا کروکا تنظیم آ تا پاننگ ءِ کہ بلوچستان ئٹی زوراکی ئٹ بیگواہی تہ کچ ئٹی کمی بتنے مَنہ بندغ آجو مریرہ اوفتان ود ءُ کچ ئس بیگواہ مریک ۔
