پاکستان ئٹی چین نا پنچ انجینیئر آتا خودکش جلہو ئٹی خلّنگ آن پد چین پاکستان ٹی اِرا منصوبہ آتا کاریم ئے توننگ نا پڑو کرینے۔
دا حوالہ ئٹ پاننگانے کہ چینی ٹھیکیدارک پاکستان ئٹی اِرا منصوبہ غاتا کاریم ئے بس کرینے۔
دا پڑو اسہ ڈیم ئسے آ کاریم کروکا چینی تہ خودکش جلہو آن پد کننگانے، اراٹی پنچ چینی و اسہ پاکستانی ڈرائیور ئس خلنگاسس۔
حوال تروکا ادارہ اے ایف پی نا تیدری تہ رد ئٹ پاکستان ئٹی اِرا بھلّو منصوبہ غاتا کاریم ئے توننگ نا ہیت بیست ءُ شش مارچ آ پاکستان ئٹی کاریم کروکا چینی تہ لاری آ جلہو آن پد کننگانے۔
جمعہ نا دے پاکستانی کارندہ آک دا حوال ئے منّیسہ پاریر کہ چین دا بھلّا جلہو تان پد ڈیم آتا کاریم ئے تورفینے۔
اسہ ہَندی کارندہ ئس پارے کہ چینی کمپنیک پاکستانی سرکار ئے پارینے کہ او دا کاریمی آ جاگہ آتا، اراڑے کم و ود دوانزدہ سد ءُ بیست ءُ پنچ چینیک کاریم کیرہ، پدا کاریم کننگ آن مُست اول پوسکُنو سکیورٹی پلان ئس پیش کریر۔ پاکستان ئٹی چینی تہ منّنگ ہڑتوما ملک آتیکن پریشانی ئس مسّنے۔
خیبر پختونخوا نا محکمہ داخلہ نا اسہ بھلّو بندغ ئس تینا پِن ئے ڈھکّیسہ اے ایف پی ئے پارینے کہ چار شنبے نا دے ” چائنا گیزوبا گروپ کمپنی” داسو ڈیم و پاور چائنا دیامیر بھاشا ڈیم آ کاریم ئے بند کرینے۔ دا سرکاری بندغ نا پاننگءِ کہ چینیک تینا رکھ ئنا زیہا داڑے اُست پورَو افّس۔”
دا بندغ نا مُستی پاننگءِ کِہ، ہفت سد ءُ پنجاہ چینیک داسو ڈیم آ و پنچ سد دیامیر بھاشا ڈیم آ کاریم کیرہ۔”
محکمہ داخلہ نا دا کارندہ نا پاننگءِ کہ چینی انجینیئر آتا ہِن و بر اوفتا جاگہ تولنگ نا اسکان کم کننگانے اراڑے او رہینگرہ۔ دا کاریم تا چین پین ہیت کتّنے ولے پاکستان آ ہر وخت زور شاغک کہ او چینی کارندہ آتا رکھ ئے کے۔
