بلوچ نیشنل موومنٹ (بی این ایم) نا شہید راشد مشکے ،آواران ہنکین نا نیمہ آن 27 مارچ مون انگا دے ئنا حوال ئٹ پروگرام مس ۔ اراٹی بندغ آ تا بھلو کچ ئس آنلائن بشخ ہرفے ۔
دا موقع آ ہیت کریر کہ پاکستان 27 مارچ 1948 آ بلوچستان آ جلہو کرسا قوضہ کننگا ۔ دا دے بلوچ راج کن مون انگا دے ئنا حیثیت ئےتخک ۔ ہندا دے آن بلوچ راج غلامی نا برخلاف مسلسل جُہد کننگءِ ۔ او پاریر کہ بیرا ہندا دے مون انگا دے اف بلکہ غلامی نا ہر دے تارمہ مریک ۔دفاعی جنگ ئٹی ہزار آتا کچ ئٹ بلوچ آک شہید مسنو و ہزار آتا کچ ئٹ زوراکی ئٹ بیگواہی نا گواچی ءُ ۔ زوراکی ئٹ بیگواہ مروکا تہ خاوت آک تینا بندغ آتا آجوئی کن دربدر ءُ یا تینا ہند آ تیان ہنپینو و مہاجرت نا زند گدریفنگ ءُ ۔ دا غلامی نا اثر ات آکءُ۔
پروگرام آ ہیت کرسا پاریر کہ ہر ساہدار آجوئی نا خواہش تخک و آجوئی ہر بندغ نا بنیاتی حق ءِ ۔ ہر بندغ تینا طاقت تون اوار آجوئی نا جنگ ئے کیک ۔ مظلوم راج آک بولی و شناخت تون اوار تینا وجود آن ہم زبہر مریرہ ۔
او مُستی پاریر کہ بلوچ تینا محکومی نا برخلاف اولیکو دے آن قوضہ گیر نا برخلاف جنگ کننگ ءِ ۔ دا وار نا جنگ ئے بیست سال آن گیش مسُنے ، بلوچ راج تینا آجوئی ئے پدا دوئی کننگ کن مسلسل جنگ کننگ ءِ ۔ دا نیام ئٹ ہزاراک سرزمین نا آجوئی کن قربان مسُنو ۔ بلوچ دا جنگ آن ہچ پدی مروف و تینا زمین ئے دوئی کرو ۔
نشست نا نظامت نا ذمہ واری ہنکین ڈپٹی سگار نا ذمہ آ اسک ۔ نشست تون بی این ایم نا مرکزی سینئر جوائنٹ سیکرٹری کمال بلوچ ، مرکزی کمیٹی نا باسک چیف محمد اسلم ، بی این ایم نا مُسکوہی مرکزی کمیٹی نا باسک ڈاکٹر خدا بخش ،شہید راشد مشکے ،آواران ہنکین نا آرگنائزر مہران ، سیکرٹری زہرہ و زرمبش بلوچی نا ایڈیٹر سرباز وفا ہیت کریر ۔
