بلوچ یکجہتی کمیٹی (کراچی) نا جارکش تینا شنگ مروکا درشان ئسیٹی پارے کہ لیاری نا بلوچ ورناک شعیب و شاہ زمان، لیاری کراچی نا رہینگوکو مزدور و گوازی گِر اسّر، ارافتے 18 اگست 2023ء آ آپریشن ئسے نا پِن آ بیگواہ کننگا و 27 مارچ 2024ء آ اوفتے خَلّنگ آن پد لاش آتا بٹیر۔
درشان ئٹی پاننگا کہ شعیب نا لمّہ پارے کہ سرکاری بندغاک ہِنوکا تُو ئنا اسہ نن ئس دو بجہ غا اُرا غان شعیب نا لمّہ نا شناختی کارڈ نا نقل ئے دریر و اودے ہتِنگ نا پاریر۔ شعیب و شاہ زمان ئے دزگیر کننگ و اوفتا لاش آتے بٹنگ اَرا بندغی مس؟ لیاری ٹی ہر نن آپریشن نا پِن آ مخلوق نا اُراتا چھاپہ خَلّنگک۔ ورناتِے ہرفّنگک و اوفتا اُرا والاتِے خُلیفنگک کہ چُپ مرورے گُڑا چُناک نما ولدا برور توار بُڑز کریرے اوفتا لاش آک برور۔
درشان ئٹی پاننگا کہ تینا چُناتا زند ئنا خاطر دا بندغاک ہِچ پاپسہ و مُچّا سال چُناتیکن انتظار کیرہ۔ لیاری و کراچی نا ایلو جاگہ غاتیٹ مخلوق ئے داخس خُلیفنگک کہ اوفتا چُناک بیگواہ مریرہ ولے او میڈیا غا دا ہیت آتے پاننگ کپّسہ، ہر نن کراچی نا بھاز انگا ہنداتان خاص وڑئٹ لیاری ٹی اُراتا چھاپہ خَلّنگک، دا عمل نا خلاف بیگواہ تہ خاوت و غُٹ بندغ دوست آتِے توار بُڑز کروئیءِ۔
