بلوچستان نا ہند دکی ٹی پاکستانی لشکر و سلاہ بند بندغ آ تا نیام ئات جھڑپ نا حوال۔
ہنوکا شام مغرب نا وخت آ دکی ٹی ناصر کول کمپنی نا ہند آ نا دُرست اِرا سلاہ بند ٹولی تہ نیام ئٹ سُمکاری مس ۔
ہندی حوالکار آ تا رد ئٹ دا جلہو بلوچ سرمچار و ریاستی مُختفی سلاہ بند بندغ آ تا نیام ئٹی مسُنے ۔
حوالکار آ تا پاننگءِ کہ جھڑپ نا وخت ریاستی مختفی سلاہ بند بندغ آ تا کُمک کن ایف سی ہموخت سر مس و جھڑپ گیش مسُنے ۔
ہندی تہ رد ئٹ جھڑپ ئٹی بھلا سلاہ تے کارمرز کننگانے ۔
ولے دائسکان جانی نسخان نا حوال رسینگتنے۔
تدینی ئے دائسکان کس تنظیم نا نیمہ آن ہرفنگ متنے ۔ ولے دا ہیت پاش ءِ کہ دا ہند ئٹی مُست ہم جلہو مسُنے ارافتا ذمہ واری تے آجوئی خواہوک سلاہ بند تنظیم آ تا نیمہ آن ہرفنگ مسُنے ۔
ایلو نیمہ آ ضلع پشین ئٹی لیویز و سلاہ بند بندغ آ تا نیامٹ جھڑپ ئٹی اَسہ لیویز کارندہ ئس خلنگا و مُسہ پین کارندہ بھاز ٹپی مس ۔
لیویز حوالکار آ تا رد ئٹ سُمکاری نا تدینی آن پدسیکیورٹی کارندہ آک کاروائی کرسا اشتہاری ملزم تیتون اوار 2درزن بندغ آ تے دزگیر کرینے و اوفتیان موٹر سئیکل و غیر قانونی سلاہ تیتون اوار دُزی کروکو سامان پیشتمانءِ۔
حوالکار پارے کہ پشین نا ہند کلی منظری ٹی لیویز فورس نا کارندہ و سلاہ بند بندغ آ تا نیامٹ ئٹ جنگ ئنا سوب آن چار لیویز کارندہ ٹپی مسُر ، ٹپی مروکا اسہ لیویز کارندہ ئس علاج نا وخت آ ساہ تس۔
