بلوچ نیشنل موومنٹ نا شنگ مروکا درشان نا رد ئٹ پارٹی جرمنی چیپٹر برلن ئٹی 27 مارچ پاکستان نا بلوچستان آ قوزہ ئنا دے ئنا رد ئٹ برانز کننگا ۔
او پاریر کہ 27 مارچ 1948 آ پاکستانی لشکر بلوچستان ئٹی پیہا و بلوچستان آ طاغت نا زور آ قوزہ کرے ۔ ہموخت آن بلوچستان نا لس مخلوق پاکستان ئے رد کرسا قوزہ نا برخلاف مزاحمت کننگءُ ۔
برانز نا وخت برانزی تیٹ پمفلٹ بشخنگا و بندغ آ تے تاریخی پس منظر تون اوار بلوچستان ئٹی برجاء انگا پاکستانی ریاست نا زوراکی تہ بابت ئٹ ہم آگاہ کریر۔
بلوچ نیشنل موومنٹ نا مرکزی کمیٹی نا باسک ھمل بلوچ ہمو وخت آ ہیت کرسا پارے کہ دا بلوچ تاریخ نا مون انگا دے ءِ ولے بلوچ راج وخت ئے تینا حق ئٹی مٹ کرو ۔ او 27 مارچ نا تاریخی پس منظر آ ہم ہیت کرے ۔
بلوچ نیشنل موومنٹ جرمنی چیپٹر نا صدر اصغر علی برانزی تیتون ہیت کرسا پارے کہ غلامی نا برخلاف توار بُڑز کننگ ننا راجی فرض ءِ ۔ پاکستان 27 مارچ 1948 آ بلوچستان آ قوزہ کرے و بلوچ اُلس ئے کیہی مصیبت آ تے مون تروئی تما ۔
او پارے کہ اَسہ اہم ءُ راجی مسخت اکن ننے تینا اُرا نا چار دیوالی تیان پیشتمسہ بھلو راجی ذمہ واری تیکن اوار مروئیءِ تانکہ تینے دا غلامی آ کشن ارادے نن 76 سال آن سگگ اُن ۔
ہندی حوالکار تیتون ہیت کرسا زور شاغہ کہ بلوچستان ہچ وخت پاکستان نا بشخ متنے و جہان دا راستی ئے منے ۔ بلوچ راج پاکستان نا استعماری حکومت ئے برداشت کروف ، بلوچ راج پاکستانی قوزہ نا برخلاف دَتر و خید ترسا جُہد کرینے۔ ننا مسخت اَسہ آجو بلوچستان ئسے۔ نن ہموخت اسکان تینا کوشست ئے الیپرون اراوخت اسکان نن پاکستان نا ظالم آ راج آن آجو متن اُن ۔
بلوچ نیشنل موومنٹ جرمنی چیپٹر نا جوائنٹ سیکریٹری شر حسن جرمن حکومت آ زور شاغہ کہ او پاکستان ئے سلاہ تننگ بند کے ۔ او پارے پاکستانی لشکر بلوچستان ئٹی معصوم بندغ آ تے خلنگ کن سلاہ کارمرز کننگءِ ۔
