بی ایل اے نا جارکش جیئند بلوچ میڈیا ٹی شنگ مروکو درشان ئسیٹی پارے کہ اینو 20 مارچ دے ئنا سئے ءُ نیم بجہ آ بلوچ لبریشن آرمی نا فدائین یونٹ مجید بریگیڈ نا ہشت فدائینک قوضہ گیر ریاست نا ڈکھوک ادارہ آئی ایس آئی و ایم آئی نا ہیڈ کوارٹر آتا جلہو کرسا 25 آن گیش کارندہ خلکُر و بہادری نا مثال جوڑ کرسا لمہ وطن کن مدامی نیمران مسُر۔ خلنگ مروکا کارندہ تیٹی دشمن نا اِرا کمیشنڈ افسر تیتون ملٹری انٹیلیجنس نا 2، آئی ایس آئی نا ہشت و آرمی،نیوی نا 14 کارندہ خلنگا۔
گواد میرین ڈرائیو آ برجاء انگا پاکستانی ڈکھوک ادارہ آئی ایس آئی و ایم آئی نا بھلا ہیڈ کوارٹر آتا ہمو وخت جلہو کننگا، وختس اوڑے اہم ءُ میٹنگ ئس برجاء ئس۔ جلہو کیہی گھنٹہ اسکان برجاء مس، اراٹی پاکستانی ڈکھکوک ادارہ ملٹری انٹیلیجنس و آئی ایس آئی نا کیہی کارندہ آک خلنگار۔ دشمن لشکر نا کُمک کن بروکا پاکستانی نیوی نا کیہی کمانڈوک بلوچ فدائین تہ سخت انگا جلہو نا گواچی مرسا خلنگار۔ میٹنگ ئٹی بشخ ہرفوکا ڈیتھ اسکواڈ نا کارندہ آک ہم خلنگ و ٹپی مسُر۔
پاکستانی ڈکھوک ادارہ آک قوضہ گیر ریاست نا بلوچ نسل کشی نا پالیسی تے نافذ کننگ ئٹی کُل آن مُستیءُ۔ معصوم بلوچ ورناتے زوراکی ئٹ بیگواہی نا گواچی کرسا اوفتے غیر انسانی ٹارچر نا گواچی کرسا دا ادارہ آک ہنوکا اِرا دہک نا وخت آ ہزار آتا کچ ئٹ بلوچ آتے شہید کرینو۔
اینو نا آپریشن ئٹی بی ایل اے مجید بریگیڈ نا ہشت فدائینک بابر ناصر عرف شہیل، کامریڈ صوالی عرف میرین، مسلم مہر عرف سالار، کریم جان عرف زوران، شوکت حکیم عرف سفر خان، مروان عرف محراب، خدا دوست عرف اسد و ریاض الہٰی عرف جنگی خان بشخ ہرفیر۔
آپریشن کمانڈر شہید فدائی شوکت حکیم گنگو عرف سفر خان ولد عبدالحکیم، خضدار نا ہند گزگی نا ہندی ئس اسک۔ او 2021 ئٹی بلوچ لبریشن آرمی تون اوار مس و 2022 ئٹی بی ایل اے مجید بریگیڈئے بطور رضاکار تینا خدمت آتے پیش کرے۔
شہید فدائی بابر ناصر عرف سہیل ولد ناصر بلوچ ملک آباد تربت نا ہندی 2020 آن بلوچ لبریشن آرمی تون تُد ئس۔ او 2022 ئٹی بی ایل اے مجید بریگیڈئے تینا خدمات آتے پیش کرے، او کامرس خواناسس۔
شہید فدائی کامریڈ صوالی عرف میرین ولد نیک بخت 2020 آن بلوچ لبریشن آرمی تون تُد مرسا راجی غلامی نا برخلاف جُہد کننگ ئس۔ کیچ ئنا ہند سنگ آباد، تجابان نا ہندی کامریڈ صوالی کیمسٹری ٹی ماسٹرز نا سند ہلکس و 2019 ٹی بی ایس او نا پلیٹ فارم آن بلوچ راجی غلامی نا برخلاف کاریم کننگ ئس۔ او ہشت توو مُست بی ایل اے مجید برگیڈئے بطور رضارکار تینا خدمت آتے پیش کرے۔
شہید فدائی مسلم مہر عرف سالار ولد مولابخش میناز بلیدہ نا ہندی ئس اسک۔ او 2023 ٹی بلوچ لبریشن آرمی تون اوار مس۔ اسہ سال ئس مُست بی ایل اے مجید بریگیڈ نا بشخ مس۔
شہید فدائی کریم عرف زوران ولد شکاری فضل ڈاکی بازار آبسر، تربت نا ہندی ئس اسک۔ اودے 2022 ئٹی ڈکھوک ادارہ آک دزگیر کریر و مُسہ توو اسکان دشمن لشکر نا ٹارچیر سیل آتیٹی اذیت سہہ۔ ڈکھوک ادارہ آتا دو آن بیگواہی و یلہ مننگ اونا تہہ ئنا راجی شعورئے گیشتر مہکم کرے، اوکان پد اسہ سال ئس مُست او بی ایل اے مجید بریگیڈئے تینا خدمت آتے پیش کرے۔
شہید فدائی مروان عرف محراب ولد نواز میناز بلیدہ نا ہندی 2021 آن بلوچ لبریشن آرمی تون تفوک ئس، او تُد مننگ تون اوار بی ایل اے مجید بریگیڈئے تینا خدمت آتے ندر کرے۔
شہید فدائی خدا دوست عرف اسد ابنِ سائرہ بی بی گیشکور، آواران نا ہندی ئس اسک۔ او پولیٹکل سائنس ئٹی تعلیم حاصل کریس ئس۔ سنگت خدا دوست 2020 ئٹی بلوچ لبریشن آرمی تون اوار مس و 2021 ئٹی بی ایل اے مجید بریگیڈئے تینا خدمت آتے پیش کرے۔
شہید فدائی ریاض الہیٰ عرف جنگی خان ولد الہیٰ بخش، بلیدہ نا ہند میناز نا ہندی ئس اسک۔ او 2017 ٹی بلوچ لبریشن آرمی نا پلیٹ آن راجی غلامی نا برخلاف کاریم کننگ ئس۔ 2020 ئٹی بی ایل اے مجید بریگیڈئے تینا خدمت آتے پیش کرے۔
دا جلہو بی ایل اے نا آپریشن زرپہازگ نا چارمی بشخ ئس۔ دا جلہو تیوعہ پیشن آن بروکا سرمایہ کار آتیکن اسہ کلہوہ ئسے ارا پاکستانی ریاست و لشکر نا دروغ ئنا تسلی تیا یخین کرسا گوادر و بلوچستان نا ایلو ہنداتیٹی سرمایہ کاری نا ارادہ تخرہ۔ اگہ بی ایل اے پاکستانی ریاست نا کُل آن گیشتر سیکیورٹی ٹی تولوک آ کُل آن زیات ڈکھکوک ادارہ آتا مرکزی دفتر آ جلہو کرسا کیہی گھنٹہ اسکان دشمن کارندہ تے نیست و نابود کننگ کیک گڑا او ارا شہر و ہند ئٹی آسانی ئٹ سرمننگ کیک۔
او ایسر ئٹ پارے کہ بلوچ لبریشن آرمی اسہ وار پدا دا قول ئے کیک بلوچستان آن قوضہ گیر پاکستان نا تیوعہ پیش تمنگ اسکان ننا جلہوک تیزی تون برجاء مرور۔
