ہشت مارچ آ سرگودھا میڈیکل کالج ، پنجاب آن خوانندہ خدا داد سراج نا زوراکی ئٹ بیگواہی نا برخلاف بلوچستان نا ضلع کیچ ئٹی ایم ایٹ کسر تجابان نا ہند آ مُسٹمیکو دے برانز برجاء ءِ ۔ برانز ئٹی زالبول و چُنا تا بھلو کچ ئس ساڑیءِ ۔
خدا داد سراج ولد سراج احمد کرکی تجابان تربت نا ہندی سے ارا سرگودھا میڈیکل کالج نا پھیتالوجی لیب سائنسز ڈیپارٹمنٹ سیکنڈ ائیر نا خوانندہ سے اودے ہشت مارچ 2024 ئنا شام 8:30 بجہ آ بہادر شاہ ظفر روڑ آ الرشید اسپتال سرگودھا نا مون آ پیہُن رنگ ئنا کلٹس لاری ئسیٹی مَنہ سلاہ بند بندغ آک زوراکی ئٹ تینتو دریر ۔
خاوت نا پاننگ ءِ کہ نن تینا ورنا تے ہزارہ کلو میٹر مُر خوانفنگ کن گدرینہ تاکہ او مونی خواننگ کیر ولے اونگا ہم اوفتے زوراکی ئٹ بیگواہی نا مون کروئی تمک او خواننگ آن زبہر ءُ اَسہ خُلیس نا ماحول ئس ودی مسُنے اراڑان لمہ باوہ تینا چُنائے پیشن گدرینگ کن خلیرہ ۔
خاوت نا پاننگءِ کہ بلوچ خوانندہ آ تا بیگواہی نا لڑ مُست بلوچستان نا جتاء ہند آتیٹ مرسا کرینے ولے داسا دا بلوچستان آن پیشن پنجاب نا جتاء جتاء شہر و ادارہ آ تے تینا پلویڑ ئٹی ہلکُنے ۔
