سیو اسٹوڈنٹس فیوچر نا جارکش شنگ مروکا درشان ئسیٹی پارے کہ تنظیم تدوکا پنچ سال آن زیات مریک کہ بلوچستان نا شہر خضدار ئٹ علمی و تعلیمی کاریم کرینے ارانا ردئٹ جتاء جتاء انگا تعلیمی پروگرام، کیریئر کونسلنگ، کتاب مُچی و ایلو تعلیمی کاریم تے کننگ ئٹی اوار مسنے۔
او پارے کہ ایس ایس ایف ئے جوڑ کننگ نا مسخت خضدار شہر ئٹ تعلیمی ماحول ئے روشن کننگ، خوانندہ آتا مسلہ آتے ختم کننگ و شہر ئنا تہٹی اسہ تعلیمی ماحول ئسے تالان کننگ ئس، تدوکا وخت ئٹ دا کاریم تے سر تننگ نا بھاز کوشست کننگانے۔ دا وخت ئٹ کیہی سختی تیان پد ہم اسہ تعلیمی پلیٹ فارم ئسینا دروشم ئٹ بلوچ خوانندہ آتا بھلُنی ئے کرسہ بسونن ولے داسہ دا جہد ئے گیشتر مونی دننگ کن بلوچ اسٹوڈنٹس ایکشن کمیٹی و سیو اسٹوڈنٹس فیوچر نا بنجاہی راہشون تہ سلاہ و فیصلہ آن پد ردئٹ دا پلیٹ فارم ئے تنظیمی کاروان نا بشخ جوڑ کننگ نا فیصلہ کننگانے۔
او پارے کہ خضدار و ایب کیب ئٹ کاریم کروکا خوانندہ آتون ایس ایس ایف بلوچستان نا تیوہ کُل آن زیات کاریم کروکا و بھلا خوانندہ گل بلوچ اسٹوڈنٹس ایکشن کمیٹی ٹی اوار کننگ نا بنیاتی مسخت خوانندہ آتے گیشتر تعلیم و سیاسی کاریم تہ نیمہ آ دننگ ءِ۔ ایس ایس ایف بلوچستان ئٹی اسٹ انگا خوانندہ ادارہ ءِ ارا راستی ئٹ بلوچ خوانندہ آتا حق و سیاسی تربیت کن کاریم کننگ ءِ اراٹی کتاب کلچر، ادبی و سیاسی پروگرام، خوانندہ آتا حق ئٹ مہم، بلوچ لٹریسی کیمپئن آ کاریم کننگ تون اوار ایلو کاریمک اوار ءُ۔ نن دا پوہ مرینہ کہ ننے تینا بھلا راجی خوانندہ ادارہ تیٹی اوار مرسا راجی حوالہ ئٹ تینا ورنا تے اوار کرسا جہد کروئی ءِ و چاگڑد ئٹی سرپند آ خوانندہ آتا دروشم ئٹ تینا کڑدئے سر تروئی ءِ۔ اواری تینا مسخت اسکان سر مننگ نا گچین آ کسرءِ ارادے ہرفسہ ننے بلوچ خوانندہ آتیکن جہد کروئی ءِ، ہندا ہمکوپہ مننگ نا فلسفہ آ نن ایس ایس ایف ئے اوار کننگ نا فیصلہ کرینن نن ہندا پوہ مرینہ ہندا حساب ئٹ نن تینا مزل آ سر مرون۔
جارکش پارے کہ نن دا فیصلہ ئے بلوچ راجی سوچ ئنا ردئٹ کرینن و خضدار تون اوار بلوچستان نا تیوعہ خوانندہ تیان خواست کینہ کہ اوفک بلوچ اسٹوڈنٹس ایکشن کمیٹی نا پلیٹ فارم آ اوار مرسا تینا تعلیمی حق و راجی ذمہ واری تے پورو کیر۔ اینو آن پد ایس ایس ایف نا ہچو اسٹرکچر ئس اف نن ایس ایس ایف ئے بلوچ اسٹوڈنٹس ایکشن کمیٹی ٹی اوار کننگ اُن۔ تنظیم ئے خضدار ئٹ فعال کرسا علمی پروگرام، کتاب میلہ و ادبی دیوان ن اڈ تننگ تون علمی و سیاسی ماحول ودی کننگ نا کوشش کرون۔
