بلوچ اسٹوڈنٹس کونسل پنجاب نا جارکش تینا شنگ مروکا درشان ئسیٹی پارے کہ تدوکا دے آ وندر کسر تدینی ٹی شہید مروکا بلوچ ورنا و بی ایس سی نا باسک سنگت شہیب و ظاہر ارافتا سنگت شہاب شیہک ، احمد و سہیل نا شہید مننگ آ غم تہ درشانی کرسہ پارے کہ دا وڑ انگا سرپند و سمائی آ ورناتا جتا مننگ راج اکن بھلو تاوان ئسے ارافتا خالی آ جاگہ تہ پُر کننگ ارزان اف ۔
او پارے کہ سنگت شہیب بلوچ بی ایس سی ( یو ایم ٹی ) لاہور نا اسہ ذمہ دار ءُ باسک ئس مسُنے کہ او تینا سیاسی سنچ و ذانت ئے دا نیام ئٹی ادارہ نا دیمرئی ،مہکمی و بلوچ خوانندہ آتا مستقبل کن جِتاءُ کڑد ئس ادا کننگ مسُنے ۔ سنگت شعیب 2021 آ یو ٹی ایم لاہور ئٹی بشخ ہرفے و تب ذانتی ( سائیکالوجی ) خواننگ ئٹی ئس ، سنگت اِرا وار بی ایس سی ( یو ایم ٹی ) کابینہ ٹی بشخ ہرفے ۔ سنگت 2022 ، 2023 ئنا سیشن اکیڈمک سیکریٹری نا عہدہ آ مس 2023 ، 2024 آ ایڈوائزر ٹو چیئرمین نا عہدہ آ مس تینا کاریم تن ایمانداری تون مونی دریسہ ئس ۔
جارکش پارے کہ سنگت ظاہر بی ایس سی ( بھاولپور ) نا باسک ئس و اسہ سرپد و پوہ مروکو خوانندہ سینا بستار و مدام سیاست نا پِڑ آ ساڑی مسُنے و وخت ئنا خواست آتا رد ئٹ کاریم ئٹی ئس ۔ سنگت ظاہر 2019 ٹی بھاولپور یونیورسٹی ٹی خواننگ ئے بِناء کرے و انٹرنیشنل ریلیشن آ 2023 آ تینا سندئے سُبمندی ئٹ ہلک و پدا بلوچستان آ بس ۔ دا نیام ئٹی سنگت اسہ وار پدا بی ایس سی ( بھاولپور ) کابینہ نا فنانس سیکریٹری مس و ادارہ ئے مہکمی ئٹ تینا بے قیمتی آ وخت ئے تِس و تینا کڑدئے ادا کرے ۔ ہندا وڑ ئٹ شھاب ، شیہک ، احمد و سہیل سیاسی حوالہ ئٹ پوہ و سرپد ءُ ورنا اسُر جتا جتا آ جاگہ آتا خواننگ تون اوار چاگڑدی ذمہ واری تے ہم پورو کننگ ئٹی اسُر ۔
