تونسہ شریف آن بلوچ خوانندہ سے زوراکی ئٹ بیگواہی نا گواچی کننگا ۔
شابیتی حوال آ تا رد ئٹ ہفتہ نا دے سلاہ بند نقاب خلوک بندغ آک تونسہ شریف آ اَسہ اُراسے آ جلہو کرسہ شعیب بزدار ولد خان محمد ئے زوراکی ئٹ تینتون اوار دریر ۔
شعیب بزدار ارا تونسہ شریف نا ہندی سے و بولان میڈیکل کالج نا خوانندہ سے ۔ اونا زوراکی ئٹ بیگواہی نا حوال ئے اونا سنگت آک پک کریر ۔
بلوچ خوانندہ آ تا زوراکی ئٹ بیگواہی ٹی اَسہ وار ولدا تیزی بسُنے ،ارانگا بلوچستان آن بلوچ خوانندہ آ ک زوراکی ئٹ بیگواہی نا گواچی مسُنو ہندا وڑ پنجاب تون اوار ایلو صوبہ آ تیان ہم بلوچ خوانندہ آ تے بیگواہ کننگ ءُ ۔
ہنوکا دے تیٹ پنجاب نا شار سرگودھا آن میڈیکل کالج پیتھالوجی لیب سائنسز نا خوانندہ و بلوچستان نا ضلع کیچ ئنا ہندی خدا داد بلوچ ولد سراج احمد ئے سرگودھا آن سلاہ بند بندغ آک بیگواہ کریر ۔
بلوچ خوانندہ آ تا زوراکی ئٹ بیگواہی آن اَسہ وار پدا تیزی بننگ تون خوانندہ تیٹی پریشانی خننگ مریک ، خوانندہ تنظیم آک خواست کرینو کہ ریاستی ادارہ آک بلوچ خوانندہ آ تے تنگ کننگے بند کیر و حکومت وخت دا تدینی تہ برخلاف ایکشن ہلے و بیگواہ مروکا خوانندہ آتے آجو کریفر ۔
یاتی مرے کہ پنجاب آن بلوچ خوانندہ آ تا زوراکی ئٹ بیگواہی تہ کیہی تدینی مسُنے ، بلوچ خوانندہ آ تے سیکورٹی ادارہ آ تا نیمہ آ تنگ کننگ ،پروفائلنگ و زوراکی ئٹ بیگواہی تہ برخلاف اسلام آباد ہائی کورٹ ئٹی پٹیشن ہم نوشتہءِ ارانگا ہنوکا دے تیٹ عدالت پاکستان نا نگران وزیراعظم ئے ہم توار کریسس ۔
اسلام آباد ہائی کورٹ حکومت ئے پنجاب ئٹی خوانوکا بلوچ خوانندہ آ تا نسلی بنیات آ تنگ کننگ ئے ایسر کننگ و بیگواہ آ خوانندہ آ تا آجوئی نا حکم تسس ، عدالتی حکم آن پد ہم دا رد ئٹ ہچو دیمرئی ئس مونی بتنے ۔
