بلوچ یکجہتی کمیٹی( کراچی) نا جارکش تینا شنگ کروکا درشان ئٹی پارے کہ سئے شمبے کراچی آن پر و سیلاب آن متاثر مروکا سد اُراتیکن راشن مون تسُن اُن ارا چار شمبے نا شام ئنا تہار ئٹی پیہُن پوشاک آ بندغ آتا اُراتہ سر کننگ مسُنو۔
او پارے کہ نن ہیت کرینُن 2022 نا وڑ گوادر و ایب کیب نا سیلاب آن متاثر مروکا بلوچ راج اتون سلوک اُن دا وخت آ پنچ باسکی کمیٹی ئس اڈ تننگانے ارا گوادر و ایب کیب آ کاریم ئے بناء کرینو۔دیوان ئٹی ہندا ہیت مسُنے کہ شہری ہند آتا ابید ہمو ہند آتیٹی کاریم کرون ارافک شہر آن مُرءُ و متاثرءُ۔ننا لڑ ئٹی پلیری،پراہ،توک،پیشکان،گنز،کپر و منہ پین ہند ءُ۔
او پارے کہ ہندُن بی وائی سی( کراچی) تینا ٹویٹر و فیسبک آ ہندا پڑوئے کرینے کہ ننے گیش کمک رسینگپننگ نا سوب آن نن سد اُراتیکن راشن مُچ کرینُن۔ پتر آ ہندا پاننگانے کہ دا سد اُراتہ راشن اسہ ہند ئسے کن بس مفرور کم آن کم پیہُن پوشاک آ بندغ آتا کاریم ئٹی بریرہ ارافک متاثرءُ و کُننگ آن زبہر ءُ۔
جارکش پارے کہ نن سفر آن مُست ہندی بندغ آتون ہیت کرینُن و پیشکان ئٹ پیہُن پوشاک آتا لڑ ئس جوڑان اُن و سنگت آتے راشن آتون اوار مون تسُن اُن۔ سنگت آک چار شمبے نا سُہب گوادر و چار شمبے نا شام پیشکان آ سر مسُنو و شام ئنا تہار ئٹی اُراتے ٹُکیفنو و راشن تسُنو۔
راج آن خواست کینہ کہ گوادر ئٹی کُمک کننگ کن ننا ہمراہ مریر۔نن زوت تینا کُمک آتے سیلاب زدہ بندغ آتے سر کین۔ دا وخت آ متاثر مروکا بندغ آتے راشن،کمبل و سامان ضرورتءِ۔
