ادارہ و سرکاری افسر آتیا دوبہ نا کیس ئٹی صحافی اسد علی طور ئے پین مُسہ دے ئکن جسمانی ریمانڈ آ ایف آئی اے نا حوالہ کننگا۔
اتوار نا دے پنچ دے ئنا جسمانی ریمانڈ پورو مننگ آن گڈ ایف آئی اے صحافی اسد علی طور ئے جوڈیشل میجسٹریٹ محمد عباس شاہ نا عدالت ئٹی ہیس۔
ایف آئی اے اسد علی طور ئنا پین مُسہ دے ئنا جسمانی ریمانڈ نا خواست کرے ہرادے جج منّا۔
ایڈوکیٹ ایمان مزاری و ایڈوکیٹ ہادی آن بیدس تینٹ اسد طور ہم دلیل تس۔
وکیل ایمان مزار ایکس آ پوسٹ کرسا پارے کہ سینیئر صحافی مطیع اللہ جان اسد علی طور ئے تینا بین برانز ئے ایسر کننگ آ راضی کرے۔
اسد طور نا رد ئٹ او سئے شمبے آن بین برانز آ اس۔
کیس بِننگ نا وختا اسد علی طور پارے کہ دزگیری ٹی اوڑان ’فوج ئنا بارو ئٹ سوج کننگ ءُ۔‘ او پارے کہ کنے راست پاننگ نا سوب آن سزا تننگ ءُ۔
اسد علی طور پارے کہ ’ ای چاگڑدی حوالکاری میڈیا آن رسینگوکا ایف آئی اے نا نوٹس آ بسٹ۔ مگہ راست پاروکا تے دا گِڑا تتون مون تروئی تمک۔‘
چاگڑدی حوالکاری میڈیا غا اسہ ویڈیو ئس تالان کننگانے ہراٹی اسد طور پاننگ ءِ کہ ’اخس ہم کیس کنے آ خلنگ مرے، ای صحافی ئسے اُٹ، اسد علی طور ہچس اف۔ ای دا کاز کن سلوک اُٹ۔‘
