بلوچ یکجہتی کمیٹی نا بنجائی ترجمان تینا شنگ کروک بیان ئٹی پارے کہ گوادر ئٹی ہار، پن ئنا میگاپروجیکٹ و خراب انفراسٹرکچرل پالیسی تا بھرم ءِ۔ دا وختا تیبہ جہان کلائمینٹ چینج ئنا سوب آن قدرتی ویل آتا پلویڑ ئٹی ءِ، تیبہ زمین نا زیہا چرجوئی ئٹ فوسلز فیول آتا کارمرز آن مُد ئنا ترندی ٹی ودکی مننگ ءِ ہرا مُد ئٹ بدلی نا سوب جوڑ مننگ ءِ۔ تیبہ جہان ئٹ دا حالیت تون مون تننگ کن انفراسٹرکچر جوڑ کننگ ءُ ہرا سد سال ئنا مُد ئٹ بدلی نا ترندی ئے مونا تخِسہ جوڑ کننگرہ تاکہ نسخان تا خلیس کم آن کم مرے ولے ریاست پاکستان نا ہچو پالیسی ئسیٹی لس بلوچ آتا زندہ مننگ کن ہچو سوبر ءُ کاریم اوار اف۔
بیان ئٹ پاننگا کہ تدوکا اِرا دہک آن گوادر ئٹ میگاپروجیکٹ نا پنا کیہی قرن آتیان آباد شاری تا زمینی حق آتے نظر انداز کرسا ہرا وڑ ئنا روڈ جوڑ کننگانے و ہامدیکا دنو انفراسٹرکچرل پالیسی اڈ تننگانے ہراڑان کیہی قرن آتیان آباد گوادر شار ئنا نشخ ئے مٹ کننگانے، ہرا نا سوب آن اینو گوادر نا ہندی مخلوق ہار کون آ قدرتی آفت تون مون تننگ ءِ و دا شار ئنا خواجہ غاک اینو بے اُرا مرسا پاش آسمان نا شیف آ زند گدریفنگ ءُ و ستم ظریفی دادے کہ گوادر ئے سنگار پور و دبئی جوڑ کننگ نا دعویٰ کروکا ریاست گوادر ئٹ ہار ئنا دیر ئے کشنگ کن اسہ مشین ئس تننگ ئٹ بےسوب مسنے۔ ہار ئنا دیر 72 ساعت آن زیات ءِ کہ شار و اُرا تا تہٹی ءِ ولے ریاستی مشینری بندغ آتے کمک تننگ کن بتنے، بیوس مرسا شاریک تینا کمک تینٹ ئٹ شار ئنا دیر ئے بھلو کچ ئسیٹی کشانو و داسکان تینا کمک تینٹ ئٹ شار ئنا دیر ئے کشنگ ءُ و اسٹ ایلو ئے کمک کننگ ءُ۔
ترجمان ودیک پارے کہ نن تیبہ جہان نا کلائمٹ ایکٹیوسٹ و بندغی حق آتا ادارہ آتیان خواست کینہ کہ او گوادر ئٹ پن ئنا شونداری ڈٹ آتا سوب آن مروک بھس کاری تا برخلاف توار بڑز کیر انتئے کہ شونداری ڈٹ آتا سوب آن مروک مُد ئنا بدلی تون اوار نیچرل ہیبیٹیٹ ئے بھس کننگ بے بندغی انفراسٹرکچر پالیسی تا بھرم ءِ۔ اگہ مُد ئنا بدلی نا ویل آ کاریم کروکا تنظیم آک اینو گوادر نا ویل آ چُپ مسر تو پگہ گوادر تون اوار تیبہ بلوچستان پین زیات بھس کاری تتون مون تننگ آ بیوس مرو۔ نن امیت کینہ کہ کلائمٹ ایکٹیوسٹ آک تیبہ جہان نا وڑ بلوچستان ئٹ پن ئنا میگا پروجیکٹ نا سوب آن ودی مروکا کلائمٹ چینج و خراب انفراسٹرکچرل پالیسی تا ویل آ توار بڑز کرور۔
ترجمان ایسر ئٹ پارے کہ بلوچ یکجہتی کمیٹی نا راہشون ڈاکٹر ماہ رنگ بلوچ و ایلو سنگت آک دا وختا گوادر ئٹ ساڑی ءُ ہرافتا رد ئٹ گوادر ئٹی حالیت بھاز خراب ءِ۔ ہار گوادر و ہیب کھیب ئنا علاقہ آتے بھاز زیمی کرینے و لس مخلوق دا وختا بھاز ہڑاند آتون مون تننگ ءِ۔ و بلوچ یکجہتی کمیٹی نا ٹولی حالیت ئے خنِسہ پارینے کہ دا وختا گوادر ئٹ دیر کشوکو مشین، ڈاکٹر، نرسنگ اسٹاف، دارو درمان، ہوم شیلٹر، خوراک و چُنا تیکن کُننگ نا گڑا تا سخت ضرورت ءِ۔ نن دا سخت انگا وخت ئٹی بلوچستان تون اوار تیبہ جہان نا بلوچ قوم ئنا بندغ آتیان خواست کینہ کہ او ریاست آن امیت تخپس و تینا بندغ آتا کمک کن مونا بریر و تینا بندغ آتا کمک ئے کرسا زندہ ءُ راج ئس مننگ نا ثبوت ایتر۔
