بلوچ وومن فورم تینا شنگ مروکا درشان ئسیٹی پارے کہ زالبول آتا جہانی دے آ خاران ئٹی سیمینار ئس اڈ تننگءُ۔
بلوچ وومن فورم نا جارکش تینا شنگ مروکا درشان ئٹی زالبول آتا جہانی دے ئنا رد ئٹ خاران ئٹی سیمینار ئس اڈ تننگ نا پڑو کرسا پارے کہ جہان نا دیہاڑ ئٹی راج آتا جوڑ کننگ و جہد ئٹی زالبول آتا بھلو کڑد ئس مسنے، بلوچ راجی جہد ئٹی بلوچ زالبول آتا کڑد، ذمہ واری، فکری و عملی سوچ ئے روشنا کننگ کن زالبول آتا جہانی دے ئنا رد ئٹ خاران ئٹی سیمینار ئس اڈ تننگءُ۔
جارکش تینا درشان ئٹی پارے کہ دیہاڑی وڑ ئٹ بلوچ چاگڑد ئٹ بلوچ زالبول آتا ہند بلوچ نرینہ آتا برابر مسنے، بلوچ زالبول ہر تلہ غا تینا کڑد ئے سر تسنے ولے بلوچ چاگڑد و دود ربیدہ ئے جشنگ مسنے و نوآبادیاتی بست و بند ننے آ چٹی کننگانے ہراٹی بلوچ زالبول آتا کڑد ئے کچ ئٹ کننگانے۔ بلوچ زالبول تے سیاسی، چاگڑدی، معاشی و تعلیمی پڑ آن مُر تخنگ نا کوشست مننگ ءِ تاکہ راجی ذمہ واری تیٹ بلوچ زالبول نا کڑد کم کننگ مرے و بلوچ زالبول آک راجی جہد ئٹ تینا کڑدئے سر تننگ کپس۔
جارکش مُستی پارے کہ بلوچ چاگڑد ئٹ نوآبادیاتی بست و بندی نفسیات ئے مونا ہتنگ نا کوشست مننگ ءِ ہراڑان تینٹ جوڑ کروک سڑداری بست و بند و پدر شائی بست و بند جاگہی مرے، ہراڑ ئٹ بلوچ زالبول آتیکن ہڑاند ودی کننگ نا کوشست مننگ ءِ، دا تینٹ جوڑ کروک سرداری و پدر شائی بست و بند نوآباد نا ودی کروکونو، دافتے پُہہ مننگ المیءِ و دُننگا بست و بند آتیان خلاسی کن بلوچ زالبول آتے مونا بروئی تمو و دا بست و بند نا برخلاف مزاحمت کروئیءِ۔
جارکش ایسر ئٹ پارے کہ بلوچ زالبول آتا بنداوی حق، چاگڑدی و تعلیمی ویل، راجی ذمہ واری، راجی تشکیل ئٹ کڑد ئنا بارو ئٹ 8 مارچ آ خاران ئٹی سیمینار ئس اڈ تننگءُ۔
