بلوچستان نا ساحلی شہر گوادر و اونا ہند آ تیٹ پِر تہ سوب آن شہر دیر آن پُر مس ۔
حق دو تحریک بلوچستان نا سربراہ و ضلع نا پوسکن انگا باسک بلوچستان اسمبلی مولانا ہدایت الرحمن نا پاننگ ءِ کہ اُرا تیٹ دیر بننگ نا سوب آن بندغ آتے مشکل نا گواچیءُ ۔
گْوادر شہر ئنا ہندی حوالکار بہرام بلوچ پارے کہ پِر ہنوکا دے ئنا سُہب آن بناء مسُنے ۔
اونا پاننگ ئس کہ 24 گھنٹہ آن ود مروکا پِر تیوعہ شہر ئنا نظام ئے درہم برہم کرینے انتئیکہ ملابند ، فقیر کالونی تون اوار شہر ئنا کُل ہند آ تیٹ دیر اُرا تیٹ بسُنے ، دکان تیٹ ہم چار چار فٹ اسکان پِر ئنا دیر پیہانے ۔
حوالکار بہرام بلوچ نا پاننگ ئس کہ گوادر نا ہند سربندن ئٹی ہم پِر ئنا دیر اُرا تیٹ بسُنے ، ہرافتان 4 دیوال بھُس مسُنے ۔
او پارے کہ ماہی گیر آتا بھازکشتی ہم بُڈینگانو۔
گوادر نا پوسکُن گچین مروکا باسک مولانا ہدایت الرحمن پارے کہ شہر ٹئی ترقی و نکاسی دیر ئنا نظام آ ارب آتا زر خلکُنو ولے نکاسی آب ئنا خراب انگا نظام نا سوب آن دیر پیشن ہننگ نا جاگہ اُرا تیٹ پیہانے ۔
او پارے کہ حق دو تحریم نا چئیرمین حسین واڈیلہ و رضاکار بندغ آ تا کمک ئے کننگ ءُ ۔
دائسکان رسینگوکا حوال آ تا رد ئٹ 10 ئنا خُڑک اُرا و چار دیواریک تمانو ، چُنا تیتون اوار بھاز بندغ آک ٹپیءُ ۔
کیہی خُڑکی ہند آ تا زمینی کسر گْوادر آن کٹ مسُنے ۔
جیونی ئٹی رکھکوک بند ئنا پننگ نا حوالءِ ، سرکاری رد ئٹ دا حوال پک متنے ۔
گوادر شہر اتون اوار سربندن ، پیشکان و خُڑکی آ ہند آ تیٹ دیر ارے ۔
