کیچ : تدوک آ سال ئنا 23 فروری آ مزنبند ئنا مش تیٹی زوراک آ پاکستانی لشکر نا ڈرون جلہو ئٹی شہید مروکا سرمچار کمانڈر میجر محمد کریم عرف ملا بہرام ، شہید ھزا عرف میرل ، شہید لیفٹینیٹ طالب عرف کمانچر ، شہید جلال عرف برمش ، شہید شہزاد عرف چراگ ، شہید آصف عرف جیہند ، شہید لیفٹینیٹ منظور عرف کیا و شہید مولا بخش عرف غفار نا شہادت ئے سال پورو مننگ آ دیوان ئس اڈ تننگا ۔
حوالکارنا رِد ئٹ دیوان استو اڈ تننگا اراڈے بھلو کچ ئسیٹی بندغ آک بخش ارفیر و راجی شہید آتے سلام ندر کریر و شہید آتا فوٹو تہ مونا موم بتی تخار ۔
یاتی مرے کہ دا راجی جہد کار آک ہمو وخت آ شہید کننگار کہ 22 فروری 2023 آ شہید میجر محمد کریم عرف ملا بہرام نا راہشونی ٹی نیمروچ آ بی ایل ایف ئنا سرمچاراک کیچ ئنا ہند مند موکندر و دوکوپ نا نیام ئٹی پاکستانی لشکر نا چار لاری تہ کاروان آ جلہو کریسُر ۔ جلہو ئٹی پاکستانی لشکر نا ہفت کارندہ آک خلنگار و کیہی کارندہ آک ٹپی مِسُر ۔
جلہو آن پد بلوچ سرمچاراک سلامتی ئٹ پیشتماسُر و او مزنبند نا مش تہ نیمہ آ ہناسُر ۔ پاکستانی لشکر نا ہند دے آ لشکر کشی ئے بِناء کرے ارٹمی دے ئنا سُہب آ سرمچاراتا جاگہ غا جنگی ہیلی کاپٹر و ڈرون آک جلہو کریر ۔
