بلوچستان نا علاقہ بولان آن حوال رسینگانے کہ پاکستانی لشکر شاہرگ نا تیبہ علاقہ ئے گھیرہ کرینے، آپریشن نا وختا فوج و سرمچار آتا نیام ئٹ جھڑپ نا حوال ہم دو بسنے۔
حوال تا رد ئٹ بولان آپریشن ئٹ پاکستانی لشکر مُستی گھام خلِسہ شاہرگ نا علاقہ ئے گھیرہ کرینے۔ پاکستان لشکر نا پندھ ئٹ بروکا کارندہ آتا بھلو کچ ئس علاقہ ٹی سر مسنے و ہیلی کاپٹر آتا بال ہم برجاء ءِ۔
حوال تروکا تا پاننگ ءِ کہ درو آن بولان نا ہیب ءَ کھیب ئٹ بناء مروک آپریشن ئٹ دا وختا شاہرگ ئے چارمہ کنڈ آن پاکستان لشکر گھیرہ کرینے۔
بولان ئٹ پاکستانی لشکر نا کنڈ آن بناء مروک آپریشن نا وختا فوج و سرمچار آتا نیام ئٹ جھڑپ نا حوال رسینگانے۔
شابیتی حوال تا رد ئٹ پاکستانی لشکر نا کنڈ آن بولان ئٹ فوجی لشکر کشی نا وختا سنجاوی نا علاقہ ٹی زامری نا ہند آ سرمچار آک پاکستانی لشکر ئے ٹک کرینو۔ تومکا کنڈ آتیان مروک جھڑپ آتیٹ بیرانی تا حوال ہم ارے۔
یاتی مرے کہ پاکستانی لشکر بولان ئٹ بھلو کچ ئسیٹی لشکر کشی بنای کرسا بولان ئے چارمہ کنڈ آن گھیرہ کننگ نا کوشست کرینے۔
ہندی حوال تا رد ئٹ آپریشن ئٹ پاکستانی لشکر ہزار آتا کچ ئٹ کارندہ و کیہی فوجی لاری و الاخ، بیش و پین جنگی مڈی تون مُستی گھام خلنگ ءِ۔
