پاکستانی لشکر بولان ئٹ ذوالفقار علی بھٹو دور ئنا وڑ ءُ لشکری آپریشن ئسے نا تیاری تیٹ اختہ ءِ، کیہی علاقہ آتیٹ لشکری ٹولی تا بننگ برجاء ءِ، آپریشن ئٹ زوراکی ئٹ بیگواہ کننگوک بندغ آتے کھسفنگ نا خلیس ارے۔
پک انگا حوال کار آک ٹی بی پی ءِ پاریر کہ پاکستانی لشکر ذوالفقار علی بھٹو دور ئنا وڑ ءُ لشکری آپریشن ئسے نا تیاری کننگ ءِ ہرا نا دک ئٹ بولان، نساؤ، چمالنگ تون اوار مری قبیلہ غا تا علاقہ کوہلو و کاہان مرور۔
حوال تروکا پارے کہ بھلو کچ ئسیٹی لشکری آپریشن نا وختا مُست آن زوراکی ئٹ بیگواہ کننگوک بندغ آتے کھسفنگ نا منصوبہ بندی کننگانے۔
خیال مرے کہ تدوکا دے سبی، مچھ و ہرنائی ٹی پاکستان فوج پندھ آ و اُلاخ آتا کاروان آ ساڑی کارندہ غاک بھلو کچ ئسیٹی مُستی گھام خلکو، اندن مچھ ئٹی فوجی ہیلی کاپٹر آتے بال کننگ آ خننگ مس۔
داکان مُست بولان نا جتا علاقہ آتیٹ جاسوس جہاز آتے ہم خننگ مس۔
