اقوام متحدہ نا سیکرٹیری جنرل اینتونیو گوتریس دو شمبے نا دے پارے کہ طالبان افغانستان نا بابت ئٹ اقوام متحدہ نا بھلُنی ٹی مروکا اجلاس ئٹی اواری کن ناقابل قبول شرط تخار۔
قطر ئٹی اِرا دے ئنا اجلاس نا ایسر آ گوتریس پارے کہ طالبان نا خواست آتیٹی سول سوسائٹی نا باسک آتا کشنک و دُنو رویہ تُد اسک ارا طالبان ئے اسہ ڈیہہ ئسینا جائز ءُ مالک ئسینا حیثیت ئٹ مننگ نا رد اسُر۔
طالبان 2021 ئٹی ہمو وخت اقتدار آ قوضہ کریس ئس وختس امریکہ و نیٹو نا فوج آک بیست سال ئنا جنگ آن پد افغانستان آن واپس ہناسُر۔ دائسکان ہچ ڈیہہ ئس طالبان نا حکومت ئے منیتنو۔ او پارے کہ زالبول آتا خواننگ و کاریم کننگ آ طالبان نا پابندی تہ مرسہ اوفتے مننگ تقریباً نا ممکنءِ۔
دوحہ ٹی مروکا اجلاس ئٹی اقوام متحدہ نا باسک ڈیہہ آک و سفیر آک اوار مسُر۔ ولئے طالبان اوار متور کہ اوفتا خواست پورو متنو۔
او پارے کہ کنے طالبان نا نیمہ آن اسہ خط ئس رسینگاسس اراٹی دا میٹنگ ئٹی اواری کن منہ شرط آک اسُر ارافک مننگ نا قابل الوسُر۔
او پارے کہ دا خواست تیٹی افغان چاگڑد ئٹی ایلو نمائندہ آتون ہیت کننگ نا حق آن نمن و اسہ ہندُنو خواست ئس کننگا ارا بھلو کچ ئسیٹی مننگ نا برخلاف ئس۔
او طالبان تہ اوار مفننگ نا عمل آ نسخان مننگ نا ہیت ئے رد کرے و پارے کہ اوفتون میٹنگ نا بابت ئٹ ہیت کننگ فائدہ مند مسکا۔بروکا وخت اکن ننے طالبان نا اواری ئے ممکن کننگ کن کسر ئس کشنگ خوائک۔
